26 апрели соли равон дар меҳмонхонаи Серенаи шаҳри Душанбе вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода бо миссияи Дафтари минтақавии Ташкилоти умумиҷаҳонии тандурустӣ дар Аврупо таҳти роҳбарии хонум Аззопарди Маскат мулоқот намуд.
Нахуст Ҷамолиддин Абдуллозода, вазири тандурустӣ ва ҳифзи иҷтимоии аҳолии Ҷумҳурии Тоҷикистон меҳмононро ба Тоҷикистон хайрамақдам гуфта, аз ҳамкориҳои мутақобилан судманди вазорат бо ТУТ изҳори қаноатмандӣ кард.
Қайд гардид, ки ҳадаф аз ташрифи миссияи Дафтари минтақавии ТУТ дар Аврупо ба Тоҷикистон-ин дастгирии таҳкими системаи тандурустӣ, бахусус бо таваҷҷӯҳ ба идоракунии қувваи кории соҳаи тандурустӣ, ислоҳоти маблағгузории соҳаи тандурустӣ, рушди КАТС, беҳтар намудани тавонбахшии маъюбон, истифодаи технологияҳои ёрирасон ва рақамикунонии соҳа дар кишвар мебошад.
Дар ин росто, зикр гардид, Ҳукумати Ҷумҳурии Тоҷикистон ба масоили баланд бардоштани иқтидори кадрии соҳаи тандурустӣ таваҷҷӯҳи махсус дода, дар ин самт пайваста тадбирҳои муҳим меандешад.