Имрӯз, 23 майи соли равон дар Вазорати тандурустӣ ва ҳифзи иҷтимоии аҳолии Ҷумҳурии Тоҷикистон вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода бо ноиби губернатори шаҳри Санкт-Петербурги Федератсияи Россия Олег Эргашев Николаевич мулоқот намуд.
Нахуст Ҷамолиддин Абдуллозода, вазири тандурустӣ ва ҳифзи иҷтимоии аҳолии мамлакат меҳмононро ба Тоҷикистони биҳиштосо хайрамақдам намуда, аз ҳамкориҳои мутақобилан судманди ду кишвари дусту бародар-Тоҷикистон ва Россия дар соҳаи тандурустӣ изҳори қаноатмандӣ намуд.
Дар навбати худ ноиби губернатори шаҳри Санкт-Петербург Олег Эргашев Николаевич қайд намуд, ки ӯ бо як қатор кормандони муассисаҳои тандурустии шаҳри мазкур ба Тоҷикистон ташриф овардааст, ки онҳо бо ҳамтоёни тоҷики худ доир ба самтҳои гуногуни соҳаи тандурустӣ, хосатан пешгирии бемориҳои сироятӣ ва ҷорӣ намудани усулҳои нави ташхис ва табобат табодули таҷриба менамоянд.
Дар идомаи мулоқот ҷонибҳо доир ба густариши ҳамкориҳои вазорат бо муассисаҳои тандурустии шаҳри Санкт-Петербурги Федератсияи Россия мубодилаи афкор намуданд.
Бояд гуфт, ки дар доираи сафари хеш мутахассисони соҳаи тибби шаҳри Санкт-Петербург аз як қатор муассисаҳои тандурустии шаҳри Душанбе дидан менамоянд.