Бо мақсади таъмин намудани амнияти санитарию эпидемиологии аҳолӣ, пешгирии паҳншавии сирояти нави коронавирус дар саросари ҷумҳурӣ, баланд бардоштани сатҳи дониши мутахассисони соҳаи тандурустӣ оид ба ташкил ва бо муваффақият гузаронидани иммунизатсия бар зидди сирояти нави коронавирус ва такмил додани усулҳои муоширати байнифардӣ дар рафти баргузории чорабинии мазкур имрӯз, 13 майи соли равон дар Муассисаи давлатии «Маркази ҷумҳуриявии иммунопрофилактика» оид ба “Муносибати байнифардӣ дар гузаронидани иммунизатсия зидди сирояти COVID-19” машғулияти омӯзишӣ доир гардид.
Директори генералии Муассисаи давлатии «Маркази ҷумҳуриявии иммунопрофилактика» Файзалӣ Саидзода машғулияти омӯзиширо ифтитоҳ намуда, вобаста ба ҳадаф ва баргузории чорабинии мазкур мухтасар суханронӣ намуд.
Дар машғулияти омӯзишӣ намояндагони марказҳои иммунопрофилактикаи марказҳои ташаккули тарзи ҳаёти солим ва марказҳои саломатии як қатор шаҳру ноҳияҳои кишвар иштирок намуданд.
Дар рафти машғулияти омӯзишӣ аз ҷониби мутахассисони соҳа вобаста ба паҳлуҳои гуногуни мавзӯи мазкур ба иштирокчиён мавзуъҳо пешниҳод карда шуд.
Бояд гуфт, ки яке аз ҳадафҳои баргузории чунин чорабинӣ-ин боз ҳам баланд бардоштани савияи дониш ва малакаи мутахассисони соҳа дар самти пурзӯр намудани маъракаи иммунизатсия бар зидди бемории коронавирус дар миёни сокинони кишвар мебошад.
![](https://moh.tj/wp-content/uploads/2018/04/8678.jpg")
