Аз ҷониби Вазорати тандурустӣ ва ҳифзи иҷтимоии аҳолии Ҷумҳурии Тоҷикистон 13 ҳазор нусха маълумотнома ва тавсияҳои Ташкилоти умумиҷаҳонии тандурустӣ оид ба паст кардани хатари сирояти коронавирус барои шаҳрвандон нашр ва ба муассисаҳои тандурустӣ тақсим карда шуд.
Иқдоми мазкур бо мақсади ҳарчи бештар огоҳонидани аҳолӣ аз сирояти мазкур ва риояи қоидаҳои санитарию гигиенӣ ҷиҳати пешгирӣ аз сироятшавӣ ба он мебошад.
Бояд гуфт, ки Вазорати тандурустӣ ва ҳифзи иҷтимоии аҳолии Ҷумҳурии Тоҷикистон бо мақсади пешгирӣ аз сирояти коронавирус назоратро дар тамоми нуқтаҳои гузаргоҳӣ ва фурудгоҳҳои байналмилалии мамлакат пурзӯр намуда, дар ин самт шабонарӯзӣ фаъолият дорад.
Айни замон беш аз 900 нафар шаҳрванди аз Ҷумҳурии Мардумии Чин ба Тоҷикистон воридгардида дар беморхонаҳои сироятии мамлакат таҳти назорати табибон қарор доранд. Хушбахтона, то кунун дар миёни онҳо сирояти коронавирус ба қайд гирифта нашудааст.
Тибқи маълумотҳои ахир, шумораи фавтидагон аз сирояти коронавирус дар Ҷумҳурии Мардумии Чин аз ҳазор гузашта, ҳамзамон, теъдоди сироятшудагон ба беш аз 42 ҳазор нафар расидааст.