Бо мақсади боз ҳам пурзӯр намудани гаштҳои хонагӣ ва зери назорати қатъӣ қарор додани бемороне, ки дар қайди марказҳои саломатӣ қарор дошта, дар хона табобат мегиранд, имрӯз, 14 июли соли равон таҳти роҳбарии Вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода ҷаласаи корӣ доир гардид, ки дар он роҳбарони як қатор марказҳои саломатии шаҳри Душанбе ва шаҳру ноҳияҳои тобеи ҷумҳурӣ иштирок намуданд.
Ҷамолиддин Абдуллозода, Вазири тандурустӣ ва ҳифзи иҷтимоии аҳолии мамлакат таваҷҷуҳи роҳбарони марказҳои саломатиро ба пурзӯр намудани гаштҳои хонагӣ, зери назорати қатъӣ қарор додани беморон, аз ҷумла бемороне ки дар хона табобат мегиранд, пурзӯр намудани корҳои фаҳмондадиҳӣ дар байни аҳолӣ ҷиҳати пешгирии бемории COVID-19 ва дигар масъалаҳо ҷалб намуд.
Бо дарназардошти он, ки вазъи бемории COVID-19 дар як қатор кишварҳои ҳамсоя нигаронкунанда боқӣ мемонад, аз ҷониби Вазири тандурустӣ ва ҳифзи иҷтимоии аҳолии мамлакат Ҷамолиддин Абдуллозода ба роҳбарони марказҳои саломатӣ супориш дода шуд, ки ҷиҳати пешгирӣ ва табобати бемории COVID-19 фаъолияти хешро боз ҳам пурзӯр намоянд.
Доир ба бартараф намудани камбудиҳои мавҷуда ба масъулин дастуру супоришҳои мушаххас дода шуд.