Душанбе, 05:07:2019 /Moh.tj/ Бо мақсади ҳифзи иҷтимоию маънавии маъюбон рӯзи 8 июли соли 2019 дар қаламрави вилоят Рӯзи маъюбон ҷашн гирифта мешавад. Дар ин бора қарори марбутаи Раиси вилояти Суғд ба тасвиб расидааст.
Бино ба иттилои дафтари матбуоти раиси вилояти мазкур, дар асоси қарори мазкур ҳайати кумитаи тадорукот ва нақшаи чорабиниҳо тасдиқ карда шуда, Шуъбаи рушди иҷтимоӣ ва робита бо ҷомеаи дастгоҳи Раиси вилоят якҷоя бо Раёсати фарҳанги вилоят ҷиҳати ташкили чорабиниҳои оммавию фарҳангӣ вазифадор гардидаанд.
“Ҳамзамон раисони шаҳру ноҳияҳои вилоят, роҳбарони идораву корхонаҳо ва ташкилоту муассисаҳо, новобаста аз шакли моликият ва фаъолияти хоҷагидориашон вазифадор шудаанд, ки бо истифодаи имкониятҳои мавҷуда маъюбонро бо ғамхории ҳамаҷонибаи моддӣ ва маънавӣ фаро гиранд ва ҷиҳати ташкили чорабиниҳои идона барои маъюбон чораҳои мушаххас андешанд”,-мегӯяд манбаъ.