Вазорати тандурустӣ ва ҳифзи иҷтимоии аҳолии Ҷумҳурии Тоҷикистон

Дар арафаи оғози таҳсили навбатӣ бо мақсади рушду такомули низоми таълим ва таҳсилоти касбии донишҷӯёни ихтисоси кори иҷтимоӣ дар факултети фалсафаи Донишгоҳи миллии Тоҷикистон бо ташаббуси кафедраи кори иҷтимоӣ, дар якҷоягӣ бо Вазорати тандурустӣ ва ҳифзи иҷтимоии аҳолии Ҷумҳурии Тоҷикистон дар мавзӯи «Роҳҳои такмили  сифати таълими мутахассисони соҳаи кори иҷтимоӣ» семинари ҷумҳуриявии илмию методӣ баргузор гардид.

Дар кори семинар олимону омӯзгорони ДМТ ва коршиносони соҳаи ҳифзи иҷтимоии аҳолии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон иштирок намуданд.

«Иштироки донишҷӯён дар ҷараёни таҷрибаомӯзӣ ҳамчун воситаи фаъоли таълим», «Амалияи кори иҷтимоӣ ҳамчун фанни нав дар ҷараёни таълими кори иҷтимоӣ», «Роҳҳои истифодабарии технологияҳои иттилоотӣ дар ҷараёни таълим» ин ва дигар мавзуъҳое буданд, ки дар  семинари ҷумҳуриявии илмию методӣ мавриди таҳлилу баррасӣ қарор дода шуд.

Қайд кардан ба мавридаст, ки пешниҳоди касби кори иҷтимоӣ ва мутахассисони соҳаи ҳифзи иҷтимоии аҳолӣ дар ҷумҳурӣ ҷараёни нисбатан нав буда, айни замон дар муассисаҳои олии таълимии кишвар танҳо дар Донишгоҳи миллии Тоҷикистон ва Донишгоҳи давлатии шаҳри Хоруғ аз рӯи ихтисоси мазкур донишҷӯён тайёр карда мешаванд.

Масъалаҳои такомул ва рушди барномаҳои таълимӣ ва таҳияи стандартҳои таҳсилоти кори иҷтимоӣ дар айни замон дар марҳилаи инкишоф қарор дошта, баргузории семинари номбурда аз иқдомҳои наҷиби донишгоҳ маҳсуб меёбад.