Дар Муассисаи давлатии “Маркази миллии тиббии Тоҷикистон “Шифобахш” таҳти роҳбарии муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон Азиз Одиназода оид ба пешгирии сирояти коронавирус машғулияти омӯзишӣ доир гардид.
Қайд карда шуд, ки айни замон масъалаи пешгирии интиқоли сирояти коронавирус ба мамлакат таҳти назорати бевоситаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қарор дорад.
Ҳадаф ва мақсад аз баргузории семинари мазкур баланд бардоштани савияи дониши кормандони соҳаи тандурустӣ ҷиҳати пешгирии сирояти коронавирус арзёбӣ гардида, зикр карда шуд, ки новобаста ба он ки то имрӯз дар Ҷумҳурии Тоҷикистон вируси мазкур ба қайд гирифта нашудааст, аммо чораҳои пешгирии он рӯз то рӯз пурзӯр карда мешаванд.
Дар идомаи семинар вобаста ба роҳҳои пешгирии сирояти коронавирус аз ҷониби мутахассисон ба ҳозирин маълумот пешниҳод карда шуд.
Бояд гуфт, ки чунин семинарҳои омӯзишӣ бо мақсади боз ҳам пурзӯр намудани чораҳои пешгирии сирояти коронавирус аз ҷониби Вазорати тандурустӣ ва ҳифзи иҷтимоии аҳолии Ҷумҳурии Тоҷикистон мунтазам дар муассисаҳои тандурустии мамлакат доир карда мешаванд.