Муовини Сарвазири Ҷумҳурии Тоҷикистон Ширин Исматуллозода ва муовини раиси вилояти Суғд Зайнура Азимӣ дар Донишкадаи политехникии Донишгоҳи техникии Тоҷикистон ба номи академик М. С. Осимӣ ташриф оварда, тариқи онлайн бо сардухтурони беморхонаҳои вилояти Суғд суҳбат намуд.
Тавре дар ин бора дафтари матбуотии Раиси шавҳри Хуҷанд иттилоъ медиҳад, директори донишкадаи мазкур Дилафрӯз Саидӣ иттилоъ дод, ки дар ҳолати ҳозираи пешгирӣ аз коронавируси нави COVID-19 донишкада метавонад саҳми худро бо ташкили онлайн мусоҳиба бо духтурон гузорад. Таъкид шуд, ки донишкада дар соҳаи технологияҳои иттилоотӣ пешсаф буда, имконият дорад тариқи онлайн конференсияҳои гуфтугӯи мустақим бо табибони вилояти Суғдро ташкил намояд. Барои ин амал, яъне ташкили видео-конференсия дар сервери донишкада барномаи махсус насб карда шудааст. Барнома айни замон барои ташкил намудани конференсия тариқи онлайн имконият медиҳад. Сервери ҷудошуда ба шабакаи интернетӣ пайваст буда, табибон аз ҷои кори худ баъди насби ин барнома дар телефонҳои мобилии худ метавонанд ба конференсия пайваст шаванд.
Сипас, тавассути ин барнома онлайн-вохӯриро бо духтурон дар толори шӯрои олимони донишкада ташкил карда шуд ва муовини Сарвазири Ҷумҳурии Тоҷикистон Ширин Исматуллозода бо муовини сардухури беморхонаи клиникавии вилояти Суғд Бахтиёр Набиев, сардухтури таваллудхонаи шаҳрӣ Муқаддам Ёқубова, духтури беморхонаи ноҳияи Бобоҷон Ғафуров Мурод Ҷӯраев, сардухтурони беморхонаҳои шаҳри Хуҷанд ва ноҳияи Ҷ.Расулов Фирдавс Тӯрахонов ва Дилмурод Раҳматуллоев, духтури беморхонаи шаҳри Истаравшан Фарҳод Обидов, сардухтури беморхонаи ҷамоати Ҳайдар Усмонов дигарон тариқи онлайн бо воситаи ин барнома аз ҳолати беморон, бо озуқаворӣ таъмин будани онҳо, риояи гигиенаи шахсӣ аз тарафи беморон ва духтурон пурсон шуда, иброз дошт, ки Давлату Ҳукумати Ҷумҳурии Тоҷикистон барои кӯмак ҳамеша омода аст.
Духтурон ба муовини Сарвазири Ҷумҳурии Тоҷикистон Ширин Исматуллозода доир ба раванди ташхису табобат иттилоъи муфассал доданд.
Сипас, Ширин Исматуллозода раёсати донишкадаро вазифадор карданд, ки шароити кории барномаро дар давоми 24 соат ҳамарӯза таъмин намоянд.
Бояд қайд намуд, ки Донишкадаи политехникии Донишгоҳи техникии Тоҷикистон ба номи академик М. С. Осимӣ дар соҳаи технологияҳои иттилоотӣ дар миқёси Ҷумҳурии Тоҷикистон яке аз пешқадамтарин баҳисоб рафта, бо ҳамин усул, яъне ташкили онлайн- конфренсияҳо ва вебинарҳо таҳсилоти фосилавиро ба роҳ мондааст. Вобаста ба ҳолати пешгирӣ аз коронавируси нави COVID-19 дар донишкада Ситод оид ба пурзӯр намудани чораҳои зиддиэпидемикӣ барои пешгирии интиқол ва пайдоиши сирояти коронавируси нави COVID-19 ташкил карда шудааст.
![](https://moh.tj/wp-content/uploads/2018/04/8678.jpg")
