Вазорати тандурустӣ ва ҳифзи иҷтимоии аҳолии Ҷумҳурии Тоҷикистон

Пешрафту шукуфоии Тоҷикистони соҳибистиқлол аз сиёсати хирадмандонаи  пешвои муаззами миллат сарчашма мегирад. Яке аз дастовардҳои бузурги Истиқлолият  барқарор намудани муносибатҳои дӯстонаву ҳамкориҳои  судманд бо  намояндагиҳои бонкҳои бонуфузи  ҷаҳон аст, ки дар фазои орому осудаи кишвар роҳандозӣ гардидааст. Институтҳои молиявӣ барои пешрафти  вазъи иқтисодиву иҷтимоии кишвари мо  дар ҳамкорӣ бо сохторҳои дохили кишвар фаъолона саҳм мегузоранд.

Дар арафаи  ҷашни бузурги миллӣ, 30-солагии истиқлолияти  давлатӣ Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ба намояндагии Бонки умумиҷаҳонӣ дар Ҷумҳурии Тоҷикистон Сипоснома ирсол намуд, ки дар он омадааст:

Барои саҳми муносиб, иштироки фаъолона ва дастгирии ҳамаҷонибаи сиёсати хирадмандонаи Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар самти баланд бардоштани ҳифзи солимии модару кудак, бахшида ба  30-солагии Истиқлолияти давлатии Ҷумҳурии Тоҷикистон сарфароз гардонида мешавад.

Вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода ҳамзамон дар сипосномаи худ қайд намудааст, ки:

Итминони комил дорем, ки минбаъд низ баҳри иҷрои самти афзалиятноки  соҳаи тандурустӣ содиқона ҳисса мегузоред.

Дар навбати худ мутахассисони лоиҳаҳои аз ҷониби Бонки умумиҷаҳонӣ дастгиришаванда, ки дар соҳаи тандурустӣ ва ҳифзи иҷтимоӣ фаъолият доранд, бо рӯҳияи баланд иброз доштанд, ки барои рушди  чунин ҳамкориҳои самаранок самтҳои фаъолияти худро боз ҳам бештару беҳтар ба роҳ монанд.