Дар асоси Қарори Ҳукумати Ҷумҳурии Тоҷикистон «Дар бораи гузаронидани рӯзҳои иммунизатсияи иловагӣ бар зидди бемориҳои сурхча ва гулафшон дар Ҷумҳурии Тоҷикистон» бо ибтикори Вазорати тандурустӣ ва ҳифзи иҷтимоии аҳолии Ҷумҳурии Тоҷикистон имрӯзҳо дар тамоми манотиқи кишвар иммунизатсия миёни кудакону навбарсони аз 1 то 9 сола идома дорад. Дар ноҳияҳои водии Рашт ва шаҳри Роғун низ маъракаи иммурнизатсия бар зидди бемориҳои сурхча ва гулафшон идома дошта то имрӯз аз 83 ҳазору 47 нафар кӯдакони аз яксола то нуҳсола 59 ҳазору 147 нафарашон ба эмгузаронии иловагӣ бар зидди бемориҳои сурхча ва гулафшон фаро гирифта шуданд.
Бояд тазаккур дод, ки мақсади гузаронидани Рӯзҳои иммунизатсияи иловагӣ бар зидди бемориҳои сурхча ва гулафшон дар Ҷумҳурии Тоҷикистон ин таъмин намудани амнияти санитарию эпидемиологии аҳолӣ, пешгирӣ намудани гардиш ва интиқоли вируси сурхча ба дигар шаҳру ноҳияҳои ҷумҳурӣ, маҳв намудани бемориҳои сурхча, гулафшон ва пешгирии алоими гулафшони модарзодӣ дар Ҷумҳурии Тоҷикистон мебошад.
Тибқи иттилои расида ҷиҳати сари вақт баргузор намудани иммунизатсия аз тарафи муассисаҳои масъули водии Рашт ва шаҳри Роғун барои кормандони бунгоҳҳои саломатии деҳот шароити хуб муҳайё карда шуд ва дар муддати се рӯз 71 фоизи нақша иҷро гардидааст.
Бояд тазаккур дод, ки тибқи натиҷаи банақшагирифташуда дар давоми Рӯзҳои иммунизатсияи иловагӣ бар зидди бемориҳои сурхча ва гулафшон дар Ҷумҳурии Тоҷикистон 1 миллиону 969 ҳазору 124 нафар кӯдакони синнашон аз 1 то 9 сола бо иммунизатсия фаро гирифта мешаванд, ки барои ин 2 164 500 вояи ваксинаи зидди бемориҳои сурхча ва гулафшон ба ҷумҳурӣ ворид карда шудааст. Маъракаи «Рӯзҳои иммунизатсияи иловагӣ бар зидди бемориҳои сурхча ва гулафшон дар Ҷумҳурии Тоҷикистон» дар дигар шаҳру ноҳияҳо ва минтақаҳои мухталифи кишвар бо мааром идома дорад.
Хотиррасон менамоем, ки «Рӯзҳои иммунизатсияи иловагӣ бар зидди бемориҳои сурхча ва гулафшон дар Ҷумҳурии Тоҷикистон» аз 15 майи соли равон оғоз гардида то ба -26 май идома хоҳад ёфт.