Субҳи имрӯз, 4 сентябри соли равон дар арафаи ҷашни бузурги миллӣ 28-солагии Истиқлолияти давлатии Ҷумҳурии Тоҷикистон ба як қатор фаъолони соҳаи тандурустӣ мукофотҳои давлатӣ супорида шуд.
Дар маросими супоридани мукофотҳои давлатӣ Ашуриён Музаффар, муовини якуми роҳбари дастгоҳи иҷроияи Президенти Ҷумҳурии Тоҷикистон, Насим Олимзода, вазири тандурустӣ ва ҳифзи иҷтимоии аҳолӣ иштирок намуданд.
Ашуриён Музаффар, муовини якуми роҳбари дастгоҳи иҷроияи Президенти Ҷумҳурии Тоҷикистон зимни баромади хеш қайд намуд, ки ҳамасола бахшида ба ҷашнҳои бузурги миллӣ фаъолон ва кормандони касбу кори гуногуни кишвар бо медал ва мукофотҳои давлатӣ қадрдонӣ карда мешаванд, ки ин иқдом баҳри ҳавасмандгардонӣ ва бедор намудани ҳисси масъулияти кории онҳо саҳм хоҳад гузошт.
Насим Олимзода, вазири тандурустӣ ва ҳифзи иҷтимоии аҳолӣ ҳозиринро ба фарорасии ҷашни бузурги миллӣ 28-солагии Истиқлолияти давлатии Ҷумҳурии Тоҷикистон шодбош гуфта, аз ҷумла иброз намуд, ки супоридани мукофотҳои давлатӣ ба кормандони фаъоли соҳаҳои мухталиф дар арафаи ҷашнҳои бузурги миллӣ ташаббуси бевоситаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон мӯҳтарам Эмомалӣ Раҳмон мебошад.
Ҳамин тавр, бо Фармони Президенти Ҷумҳурии Тоҷикистон Эмомалӣ Раҳмон ба як қатор кормандони фаъоли соҳаи тандурустӣ аз ҷониби Ашуриён Музаффар, муовини якуми роҳбари дастгоҳи иҷроияи Президенти Ҷумҳурии Тоҷикистон “Медали хизмати Шоиста” ва “Шафқат” супорида шуд. Аз ҷумла Ҳоҷиев Абдушафеъ Бобомуродович, Директори генералии маркази тиббии “Шифо”, Шарипов Азизулло Содирович, Директори маркази ҷумҳуриявии бемориҳои тропикӣ, Маҳмудов Ҷурабек, Сартабиби дармонгоҳи шаҳрии стоматологӣ барои саҳми намоён гузоштан дар рушди соҳа бо “Медали хизмати шоиста” қадрдонӣ карда шуданд.
![](https://moh.tj/wp-content/uploads/2018/04/8678.jpg")
