Санаи 24-уми июни соли 2022 дар Китобхонаи ҷумҳуриявии илмию тиббӣ бахшида ба 25-умин солгарди Рӯзи Ваҳдати миллӣ семинари илмӣ-амалӣ таҳти унвони «Ваҳдати миллӣ – кафили субот ва рушди ҷомеаи Тоҷикистон» семинари илмӣ баргузор гардид.
Дар семинар корманди раёсати ташкилии хизматрасонии тиббӣ ва технологияи муосири Вазорати тандурустӣ ва ҳифзи иҷтимоии аҳолии Ҷумҳурии Тоҷикистон – Абдуллоева Фирӯза, номзади илмҳои ҳуқуқ, ҳуқуқшиноси Муассисаи давлатии «Комиссияи олии аттестатсионии назди Президенти Ҷумҳурии Тоҷикистон» – Қодиров Некрӯз Абдулмаҷидович, сармутахасиси шуъбаи таблиғотӣ ва иттилоотии Кумитаи иҷроияи ҲХДТ дар ноҳияи Исмоили Сомонӣ – Гадоев Абдурасул, мудири шуъбаи китобхонаи шаҳраки Донишгоҳи миллии Тоҷикистон – Умаров Иқболшо Музафарович, сармутахасиси шуъбаи адабиёти хориҷии Муассисаи давлатии «Китобхонаи миллии Тоҷикистон» – Саломов Абдуғаюр, корманди рӯзномаи “Ҷумҳурият”, узви Иттифоқи нависандагони Тоҷикистон – Бузургмеҳри Баҳодур, сардори шуъбаи хизматрасонии махсуси Муассисаи давлатии «Китобхонаи миллии Тоҷикистон» – Орумбекова Мавзуна, сардори шуъбаи илмӣ ва тадқиқотии Муассисаи давлатии «Китобхонаи миллии Тоҷикистон» – Зафари Гулмурод ва кормандони муассиса иштирок ва суханронӣ намуданд.
Семинари илмиро бо сухани табрикӣ директори муассиса Аминов Фирдавс ҳусни оғоз бахшида, ҳозиринро бо рӯзи Ваҳдати миллӣ самимона табрику муборакбод намуда, иброз намуд, ки Ваҳдату истиқлолият кафолати тансиҳатӣ, хонаободӣ, сарбаландӣ ва сабзу хуррам гаштани Ватан аст.
Муҳимтарин омили ваҳдат пеш аз ҳама меҳру муҳаббат ба Ватан ва ба забону фарҳанг аст. Ҳар яки мо фарзанди як миллат ва як сарзамин ҳастем ва ҳар як ваҷаб хоки Ватан ва ҳамаи афроди ҷомеа барои мо ба мисли падару модар ва хоҳару бародар азизанд.
Ваҳдати миллӣ моҳият ва арзишҳои худро дошта, ба қадр, муҳтаво ва асолати он расидан худ кори муқаддас ва бузург мебошад. Чуноне Асосгузори сулҳу ваҳдати миллӣ – Пешвои миллат, Президенти Тоҷикистон муҳтарам Эмомалӣ Раҳмон изҳор доштаанд: «Ваҳдат рамзи воқеӣ ва ҷавҳари фалсафаи сулҳофарӣ, фарҳангсолориву таҳаммулпазирии миллати тоҷик ва таҷассумгари иттиҳоду ҳамбастагии тамоми мардуми Тоҷикистон мебошад».