Вазорати тандурустӣ ва ҳифзи иҷтимоии аҳолии Ҷумҳурии Тоҷикистон

Чанде қабл тариқи сомонаҳои интернетӣ вобаста ба вазъи саломатии шаҳрванд Қадами Қурбон навори видеоӣ нашр гардид, ки аз ҷониби шаҳрвандон вокунишҳои гуногунро ба бор овард.

Пас аз он, ки навори мазкур дар сомонаҳои интернетӣ нашр гардид,  санаи 7 майи соли равон тибқи супориши бевоситаи вазири тандурустӣ ва ҳифзи иҷтимоии аҳолии Ҷумҳурии Тоҷикистон масъулини Раёсати тандурустии вилояти Хатлон ба аёдати Қадами Қурбон рафта, номбурдаро тавассути нақлиёти ёрии таъҷилӣ барои ташхис ва табобат ба пойтахти кишвар-шаҳри Душанбе, ба Муассисаи давлатии  “Пажӯҳишгоҳи гастроэнтерология” интиқол доданд.

Дар пажӯҳишгоҳи мазкур барои муайян намудани бемории шаҳрванд Қадами Қурбон як гурӯҳ мутахассисон иборат аз профессорон таъсис дода шуда, номбурда ба ташхисҳо фаро гирифта шуд.

Дар натиҷа муайян гардид, ки шаҳрванд Қадами Қурбон чанд соли охир бемории захми меъдаи дувоздаҳангушта дошта, айни ҳол ин беморӣ дар ӯ дар ҳолати хуруҷ  қарор дорад.

Ҳамин тавр, ба номбурда бо дардҳои шикам дар гирди ноф ва қабзия ташхис гузаронида шуда, қабзияти музмин бо рентген нишон дод, ки рудаи ғафси номбурда каме дароз мебошад.

Пас аз гузаронидани амалиёти тоза кардани рудаҳо аломатҳои дарди руда дар организми шаҳрванд Қадами Қурбон гум шуда, вазъи саломатии номбурда хуб мебошад.

Зикр намудан ба маврид аст, ки ҷараёни ташхис ва табобати шаҳрванд Қадами Қурбон пурра ройгон ба роҳ монда шудааст.