Вазорати тандурустӣ ва ҳифзи иҷтимоии аҳолии Ҷумҳурии Тоҷикистон

Такмили ихтисос ва бозомӯзии кормандони соҳаҳои ҳифзи иҷтимоии аҳолӣ яке аз самтҳои муҳими фаъолияти Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ба шумор меравад. Дар ин самт соли 2018 дар муассисаҳои давлатии “Маҷмааи таълимию таҷрибавии кори иҷтимоӣ ва инноватсияҳо” ва «Пажӯҳишгоҳи экспертизаи тиббию иҷтимоӣ ва тавонбахшии маъюбон» як қатор корҳо ба анҷом расонида шудаанд.

Дар давоми соли 2018 тибқи нақшаи корӣ ва барномаҳои таълимии “Маҷмааи таълимию таҷрибавии кори иҷтимоӣ ва инноватсияҳо” 5 давраи (курсҳои) омӯзишӣ ва такмили ихтисос аз рӯи мавзуъҳои алоқаманд ба кормандони иҷтимоии шӯъбаҳои хизматрасонии иҷтимоӣ дар хона, хона-интернатҳо ва марказҳои хизматрасонии иҷтимоӣ, ҳамчунин, кормандони бахшҳои ҳифзи иҷтимоии аҳолии шаҳру ноҳияҳои ҷумҳурӣ гузаронида шуданд, ки дар маҷмӯъ 186 нафар дар он ҷалб гардиданд.

Баҳри тақвият бахшидани корҳо дар самти тайёр намудани кадрҳои илмӣ, такмили ихтисоси табибон-экспертҳои соҳаи экспертизаи тиббию иҷтимоӣ ва меҳнатӣ ва табибону кормандони миёнаи тиббии муассисаҳои ҳифзи иҷтимоии аҳолӣ дар Маркази захиравию таълимии назди Муассисаи давлатии  «Пажӯҳишгоҳи экспертизаи тиббию иҷтимоӣ ва тавонбахшии маъюбон» аз рӯи се барномаи таълимӣ: “Экспертизаи тиббию иҷтимоӣ ва тавонбахшии маъюбон”, “Кори ҳамширагӣ дар экспертизаи тиббию иҷтимоӣ ва тавонбахшии маъюбон” ва “Асосҳои кори иҷтимоӣ” ду давраи омӯзишию таълимӣ гузаронида шуд.

Соли 2018 дар заминаи марказҳои таълимию клиникии тибби оилавӣ 900 нафар кормандони тиб ба давраи бозомӯзӣ аз рӯи ихтисоси тибби оилавӣ фаро гирифта шуданд. Бояд қайд намуд, ки 741 бозомӯз, аз онҳо 97 нафар табиб, 644 нафар корманди миёнаи тиб давраҳои бозомӯзиро идома дода истодаанд.

Қайд кардан лозим аст, ки то имрӯз стандартҳои ташхисию табобатӣ барои сатҳи кӯмаки аввалияи тиббию санитарӣ (табибони оилавӣ) аз рӯи 100 номгӯи бемориҳо таҳия гашта, 40000 дастурҳои клиникӣ ба кормандони тибби муассисаҳои КАТС-и шаҳру ноҳияҳо дастрас карда шудаанд.

Дар маҷмӯъ, айни ҳол шумораи табибони оилавии омӯзонидашуда дар муассисаҳои кӯмаки аввалияи тиббию санитарии ҷумҳурӣ 4352 нафар ва кормандони миёнаи тибби оилавӣ 8155 нафарро ташкил медиҳанд.

Бо фармоиши Вазири тандурустӣ ва ҳифзи иҷтимоии аҳолии Ҷумҳурии Тоҷикистон барои боздид ва амалӣ намудани “Тартиби таҳсилоти муттасили мутахассисони тибби оилавӣ дар Ҷумҳурии Тоҷикистон” гурӯҳи корӣ таъсис дода шуда, тартиби таҳсилоти мутахассисони тибби оилавӣ дар Ҷумҳурии Тоҷикистон таҳия ва тасдиқ гардида, айни замон дар шаҳри Турсунзода ба таври таҷрибавӣ амалӣ шуда истодааст.