10 майи соли равон дар меҳмонхонаи Серена бо иштироки табибони ӯзбекистонӣ семинари омӯзишӣ оид ба пешгирӣ ва табобати сирояти коронавируси нави COVID-19 баргузор гардид.
Дар рафти семинар аз ҷониби мутахассисони ӯзбек ба табибони тоҷик роҳҳои пешгирӣ ва табобати сирояти коронавирус ва дигар масъалаҳои вобаста маълумот пешниҳод карда шуд.
Чунин семинарҳои омӯзишӣ бо иштироки мутахассисони ӯзбек ва табибони тоҷик ҷиҳати пешгирӣ ва табобати беморони гирифтори сирояти коронавируси нави COVID-19 гузаронида мешавад.
Қобили зикр аст, ки бо ташаббуси бевоситаи Президенти Ҷумҳурии Ӯзбекистон муҳтарам Шавкат Мирзиёев 8 майи соли равон 8 нафар мутахассисони узбекистонӣ бо шумули пулманолог, реаниматолог, эпидемиолог, вирусолог ва ҳамшираи тиб бо мақсади мусоидат намудан ба ҳамтоёни тоҷики хеш ҷиҳати пешгирӣ ва табобати беморони сирояти коронавируси нави COVID-19 ба Ҷумҳурии Тоҷикистон ташриф оварданд.
Ҳадаф аз ташрифи табибони ӯзбекистонӣ додани тавсияҳо аз таҷрибаи хеш ба ҳамтоёни тоҷики худ ҷиҳати муолиҷаи нафарони гирифтори сирояти коронавирус мебошад.
Ҳамзамон, аз ҷониби кишвари Ӯзбекистон кӯмаки башардӯстона, аз қабили таҷҳизоти тиббӣ ва доруворӣ, воситаҳои муҳофизати шахсӣ ва дигар маҳсулоти тиббӣ ҷиҳати пешгирӣ ва табобати сирояти коронавируси нави COVID-19 ба Тоҷикистон ворид гардиданд.
Бояд гуфт, ки қаблан низ ҷониби Ӯзбекистон ба Ҷумҳурии Тоҷикистон маводҳои муҳофизатӣ ва безараргардонӣ, дастгоҳи нафасдиҳӣ ва тести озмоишӣ ҷиҳати пешгирии сирояти коронавируси нави COVID-19 кӯмак намуда буд.
![](https://moh.tj/wp-content/uploads/2018/04/8678.jpg")
