Тавре қаблан иттилоъ дода будем, бо мақсади пешгирии бемории COVID-19 мутахассисони Муассисаи давлатии “Маркази ҷумҳуриявии ташаккули тарзи ҳаёти солим” дар шаҳру ноҳияҳои кишвар дар байни аҳолӣ корҳои фаҳмондадиҳиро ба роҳ мондаанд.
Чунин чорабинии оммафаҳмонӣ таҳти унвони “Худ ва дигаронро аз сирояти коронавируси нави COVID-19 ҳифз намоед” аз ҷониби Маркази ташаккули тарзи ҳаёти солим дар шаҳри Кӯлоб доир карда шуда, дар ҷараёни он ба шаҳрвандон ниқобҳои тиббии истифодаашон яккарата ва варақаҳои иттилоотӣ оид ба пешгирии бемории COVID-19 тақсим карда шуд.
Зимни вохурӣ ба шахсоне, ки қоидаҳои гигиенаи шахсӣ ва ҷамъиятӣ, пӯшидани ниқобҳои тиббӣ ва фосилаи иҷтимоиро риоя намекунанд, нисбат ба хатарҳои бемории COVID-19 иттилоъ дода шуда, ҳамзамон, аз онҳо даъват ба амал оварда шуд, ки ҳангоми гаштугузор дар кӯчаву хиёбонҳо тозагӣ, пӯшидани ниқоб ва фосилаи иҷтимоиро қатъиян риоя намоянд.
Ҳамзамон, бояд гуфт, чунин чорабиниҳои оммафаҳмонӣ аз ҷониби мутахассисони марказҳои ҷумҳуриявии ташаккули тарзи ҳаёти солим дар дигар шаҳру ноҳияҳои кишвар низ доир гардида истодаанд.