Котиби генералии СММ Антониу Гутерреш гуфт, ки хуруҷи коронавирус аз зери назорат берун мешавад. Дар ин бора АМИТ «Ховар» бо истинод ба Хадамоти ахбори СММ иттилоъ медиҳад.
Ба гуфтаи вай, дар айни замон барои амнияти ҷаҳонӣ пандемия «таҳдиди рақами аввал» аст ва ба зудӣ инсоният аз марзи фавти як миллион тан ба асари тавсеаи вирус убур хоҳад кард. Котиби генералӣ таъкид кард, ки ҳарчанд бисёриҳо ба ваксина умед бастанд, аммо то ҳол барои пандемия нӯшдору вуҷуд надорад. Вай афзуд, ки ваксина худ ба худ буҳронро рафъ намекунад.
Гутерриш инчунин зикр кард, ки воситаҳои табобати ин беморӣ бояд нархи дастрас дошта бошанд. Вай изҳор дошт, ки — ваксина сарвати умумиҷаҳонии ҷамъиятӣ аст.
Қаблан роҳбари Созмони умумиҷаҳонии тандурустӣ Тедрос Адан Гебрейесус гуфта буд, ки доруе, ки битавонад COVID-19 -ро маҳв намояд, вуҷуд надорад. Ба гуфти ӯ раҳоии абадӣ аз коронавирус, сарфи назар аз умедвориҳои калон ба ваксинаи муассир ғайриимкон аст.
ДАР АКС: Антониу Гутерреш. Акси: MIKE SEGAR / Reuters
![](https://moh.tj/wp-content/uploads/2018/04/8678.jpg")
