Бо мақсади ҷалби ҷавонон ба корҳои тарғиботию ташвиқотӣ дар самти пешгирии бемории COVID-19 имрӯз, 12 ноябри соли равон дар маҷлисгоҳи Хадамоти назорати давлатии санитарию эпидемиологӣ бо аъзоёни Ташкилоти ҷамъиятии “Иттиҳодияи табибони ҷавон” дар назди Вазорати тандурустӣ ва ҳифзи иҷтимоии аҳолии Ҷумҳурии Тоҷикистон вохурӣ доир гардид, ки дар он намояндаи Маҷмааи тандурустии “Истиқлол” ва директори маркази матбуоти Вазорати тандурустӣ ва ҳифзи иҷтимоии аҳолӣ Эмомалӣ Мирзоев иштирок намуданд.
Дар ҷаласа зикр гардид, ки аъзоёни ташкилоти ҷамъиятии “Иттиҳодияи табибони ҷавон” имрӯзҳо бояд ҳамчун як қувваи ёрирасон ба табибон дар самти пешгирии бемории COVID-19 саҳмгузор бошанд.
Бояд гуфт, ки ҳадаф аз таъсиси ташкилоти мазкур дар назди вазорат дар байни мардум гузаронидани корҳои тарғиботию ташвиқотӣ ҷиҳати пешгирии ҳар гуна бемориҳо мебошад. Айни замон, ки бемории коронавируси нави COVID-19 дар баробари кишварҳои олам сокинони кишвари моро низ нигарон намудааст, аъзоёни ин ташкилоти ҷамъиятиро, ки аксаран табибони ҷавон ва аз соҳа огоҳ мебошанд, зарур аст, ки дар самти пешгирии ин беморӣ дар байни аҳолӣ корҳои фаҳмондадиҳро пурзӯр намоянд.
Дар навбати худ табибони ҷавон иброз доштанд, ки ҳамчун як қувваи ёрирасон дар паҳули табибони кишвар қарор гирифта, дар пешгирии бемории COVID-19 саҳми хешро хоҳанд гузошт.