10 декабри соли равон дар доираи машваратҳои байниҳукуматии Ҷумҳурии Тоҷикистон ва Ҷумҳурии Федеративии Олмон оид ба ҳамкориҳои молиявию техникӣ дар 2020 бо иштироки муовини якуми вазири тандурустӣ ва ҳифзи иҷтимоии аҳолии Ҷумҳурии Тоҷикистон Ғафур Муҳсинзода ва намояндагони ҳайати Ҷумҳурии Федеративии Олмон видеоконфронс доир гардид.
Ғафур Муҳсинзода вазъи ҳамкориҳои кишварро бо Олмон мусбат арзёбӣ намуд ва қайд гардид, ки ин ҳамкориҳо асосан ба масъалаҳои дастрасии ҳамаи табақаҳои аҳолӣ, хусусан минтақаҳои деҳотӣ ба хизматрасонии тиббӣ, соҳаи модару кўдак, танзими оила, таъмини бехатарии хўрока, пешгирӣ ва мубориза бо бемории сил нигаронида шудааст.
Ҷонибҳо бори дигар тасдиқ карданд, ки ҳамкориҳои соҳаи тандурустии Тоҷикистону Олмон барои расонидани хадамоти босифати тандурустӣ дар доираи SDG 3 бо мақсади беҳтар намудани саломатии аҳолии Тоҷикистон равона карда шудааст, ки он бояд ба беҳтар шудани дастрасии ҳамаи гурӯҳҳои аҳолӣ, алахусус дар деҳот ба хидматҳои асосии тиббӣ, ки ба стандартҳои байналмилалӣ мувофиқат мекунанд ва ба таври устувор маблағгузорӣ мешаванд, кӯмак кунад.
Инчунин, дар рафти ҷаласаи маҷозӣ ҷонибҳо оид ба тавсеа бахшидани ҳамкориҳо дар самти мубориза бар зидди бемории сил, хизматрасонии босифати тиббӣ ба модар ва кӯдак, таъмини амнияти озуқавории модарон ва кӯдакон ва дигар масъалаҳо мубодилаи афкор намуданд.
Вазорати тандурустӣ ва ҳифзи иҷтимоии аҳолии Ҷумҳурии Тоҷикистон тибқи тартиби муқарраршуда барои иҷрои Протоколи машваратҳои байниҳукуматии Ҷумҳурии Тоҷикистон ва Ҷумҳурии Федеративии Олмон оид ба ҳамкориҳои молиявию техникӣ тамоми чораҳои заруриро меандешад.
![](https://moh.tj/wp-content/uploads/2018/04/8678.jpg")
