Рӯзи 13 апрели соли равон Корвони саломатии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон дар шаҳри Кулоб ба мардуми маҳаллӣ ва ноҳияҳои гирду атроф хизмати ройгони тиббӣ хоҳад расонд. Дар ҳайати Корвони саломатӣ беш аз 65 нафар мутахасисони баландпояи соҳаи тибб, устодони ДДТТ ба номи Абӯалӣ ибни Сино, сармутахассисони соҳа, устодони Донишгоҳи баъдидипломии кормандони тиби Тоҷикистон, директорону мутахассисони муассисаҳои ҷумҳуриявӣ ба мардуми маҳаллӣ хизмат мерасонанд. Дар баробари маслиҳату машварат ҳамчунин аҳолӣ аз ташхиси ройгони тиббӣ гузаронида мешаванд. Бо ин мақсад мошинҳои сайёри флюрографӣ, ташхиси ҷузъҳои хун, ташхиси ВНМО, ташхиси бемориҳои сироятӣ сафарбар карда шудаанд. Ҳамчунин мутахассисони муассисаҳои марказӣ дастгоҳҳои ташхиси ултрасадо, сабти барқии кори дил, ташхиси гастроскопӣ, офталмологӣ, гӯшу гулӯ ва бинӣ ва дигар асбобҳои заруриро ба худ доранд. Чорабиниҳои асосӣ дар Беморхонаи клиникии вилоятии ба номи Ҳақназаров ва Маркази саломатии рақами 2 шаҳри Кулоб баргузор мегарданд.
Дар ин руз дар шаҳри Кулоб тамоми ташхису маслиҳатдиҳӣ тарики ройгон сурат хоҳад гирифт.
![](https://moh.tj/wp-content/uploads/2018/04/8678.jpg")
