Ба ҳолати 20 июни соли ҷорӣ 12 766 сомонӣ маблағи фитри рӯза, ки кормандони муассисаҳои системаи ҳифзи иҷтимоии аҳолӣ ҷамъ карданд, ҷиҳати дастрас намудан ба ниёзмандон супорида шуд. Ин иқдом дар маҷлиси умумии Иттифоқи касабаи кормандони дастгоҳи марказии Агентии давлатии ҳифзи иҷтимоии аҳолии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон, ки рӯзи 19 июн сурат гирифт ба амал омадааст.
Директори Агентии давлатии ҳифзи иҷтимоии аҳолии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон – Холзода Абдулҳаким Қувват зимни баромади хеш дар чорабинӣ қайд намуд, ки аз қадимулайём кӯмак намудану дасти ёрӣ дароз кардан ба шахсони ниёзманду барҷомонда аз анъанаву суннатҳои мардуми тоҷик ба ҳисоб мерафт ва то имрӯз ин хислати неки инсонӣ боқӣ мондааст.
Кӯмаку дастгирӣ ва ғамхориҳои давлату Ҳукумати Ҷумҳурии Тоҷикистон таҳти роҳбарии сарвари хирадмандамон Асосгузори сулҳу Ваҳадти миллӣ, Пешвои миллат, Президенти Ҷумҳурии Тоҷикистон, Ҷаноби Олӣ муҳтарам Эмомалӣ Раҳмон ба маъюбону пиронсолон ва дигар табақаҳои аҳолии эҳтиёҷманд далели гуфтаҳои болост.
Кӯмаки кормандони соҳаи ҳифзи иҷтимоӣ ба ниёзмандону табақаи камбизоати аҳолӣ идома дорад.