Имрӯз, 27 майи соли равон дар Вазорати тандурустӣ ва ҳифзи иҷтимоии аҳолии Ҷумҳурии Тоҷикистон вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода Сафири Ҷумҳурии Туркия дар Ҷумҳурии Тоҷикистон Эмре Зекӣ Карагёлро ба ҳузҳур пазируфт.
Нахуст Ҷамолиддин Абдуллозода, вазири тандурустӣ ва ҳифзи иҷтимоии аҳолии Ҷумҳурии Тоҷикистон Эмре Зекӣ Карагёлро барои ба вазифаи Сафири Ҷумҳурии Туркия дар Ҷумҳурии Тоҷикистон таъин гардиданаш шодбош намуда, ба фаъолияти минбаъдаи кории ӯ барору муваффақият орзу намуд.
Тавре зикр гардид, ҳанӯз соли 1996 Созишномаи ҳамкорӣ байни Вазорати тандурустии Тоҷикистон ва Ҷумҳурии Туркия ба имзо расида, имрӯз ҳамкориҳои ду кишвар дар соҳаи тандурустӣ дар марҳалаи рушд қарор доранд.
Гуфта шуд, ки имрӯз дар Тоҷикистон 115 ширкати фарматсевтӣ ва 117 намуд маводи дорувории кишвари Туркия ба қайд гирифта шудааст.
Қайд гардид, ки Намояндагии Агентии туркӣ оид ба ҳамкорӣ ва ҳамоҳангсозӣ (TIKA) бо Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ҳамкориҳои хубро ба роҳ мондааст.
Дар ҷараёни мулоқот ҳамзамон ҷонибҳо доир ба сафарбарнамоии табибони тоҷик ҷиҳати гузаштан аз такмили ихтисос ва таҷрибаомӯзӣ дар кишвари Туркия, ҳамкориҳо дар самти рушди фаъолияти бахши хусусӣ, истифодаи имкониятҳои мавҷуда ва рушди ҳамкориҳои дуҷониба мубодилаи афкор намуданд.