Вазорати тандурустӣ ва ҳифзи иҷтимоии аҳолии Ҷумҳурии Тоҷикистон

Бо мақсади иҷрои дастуру супоришҳои Асосгузори сулҳу ваҳдати миллӣ, Пешвои миллат, Президенти  Ҷумҳурии Тоҷикистон муҳтарам Эмомалӣ Раҳмон дар самти беҳтар намудани хизматрасонии тиббӣ ба аҳолӣ давоми солҳои охир дар мамлакат чорабинии тиббию машваратии “Корвони саломатӣ” роҳандозӣ гардида, дар доираи  он сокинони манотиқи гуногуни кишвар ба хизматрасониҳои  тиббии ройгон фаро гирифта мешаванд.

Аз 16 то 18 майи соли равон чорабинии тиббию машваратии “Корвони саломатӣ” таҳти роҳбарии муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон Шодихон Ҷамшед иборат аз мутахассисони соҳибтаҷрибаи соҳаи тандурустии мамлакат ба ноҳияҳои Дарвоз  ва Ванҷи Вилояти Мухтори Кӯҳистони Бадахшон сафар намуд.

Дар доираи ин чорабинии солимгардонӣ садҳо сокинони ноҳияҳои болозикр аз ташхис ва муоинаҳои ройгони тиббӣ гузашта, инчунин ба саволҳои хеш доир ба бемориҳои гуногун  аз мутахассисони варзидаи соҳаи тандурустии мамлакат посухҳои мушаххас гирифтанд.

Чорабинии мазкур имкон дод, то шаҳрвандони ноҳияҳои мазкур дар баробари аз хизматрасониҳои ройгони тиббӣ истифода намудан, ҳамзамон аз тавсия ва маслиҳати табибони соҳибтаҷрибаи кишвар низ бархурдор гардида, баҳри таъмини солимии хеш аз онҳо тасияҳои муфид бигиранд.

Ҳамзамон, дар доираи ин чорабинӣ дар ноҳияи Ванҷ аттестатсияи 12 нафар кормандони соҳаи тандурустии ноҳия бо иштироки муовини вазир Шодихон Ҷамшед ва мутахассисони соҳибтаҷрибаи соҳаи тандурустии  мамлакат Душанбе гузаронида шуд.

Дар маҷмӯъ, сокинони ноҳияҳои Дарвоз ва Ванҷ аз ташрифи табибони соҳибтаҷрибаи кишвар ба маҳали зисташон изҳори хушнудӣ намуда, дар навбати худ ба Ҳукумати мамлакат ва Вазорати тандурустӣ ва ҳифзи иҷтимоии аҳолӣ  баҳри таъмини сиҳатии омма ва дар ин замина пайваста андешидани чораҳои муҳиму саривақтӣ изҳори миннатдорӣ баён намуданд.

Яке аз тасмимҳои хеле хуби Ҳукумати Ҷумҳурии Тоҷикистон ва Вазорати тандурустӣ ва ҳифзи иҷтимоии аҳолӣ, ки мунтазам амалӣ карда мешавад, ташкил ва баргузор намудани “Корвони саломатӣ” мебошад, ки он ҳамасола дар шаҳру ноҳияҳо ва вилоятҳои ҷумҳурӣ доир гардида, ба мардум ба таври ройгон хизматрасониҳои тиббӣ расонида мешавад.