Имрӯз, 23 ноябри соли равон дар Вазорати тандурустӣ ва ҳифзи иҷтимоии аҳолии Ҷумҳурии Тоҷикистон таҳти роҳбарии вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода вобаста ба омодагии муассисаҳои тандурустӣ ва ҳифзи иҷтимоии аҳолии мамлакат ба давраи тирамоҳу зимистони солҳои 2023-2024 ҷаласаи корӣ баргузор гардид, ки дар он ҳамзамон муовини якуми вазир Ғафур Муҳсинзода, муовини вазир Зулфия Абдусаматзода, сардорони раёсат ва шӯъбаҳои дахлдор ва ҳамзамон ба тариқи онлайн роҳбарони як қатор муассисаҳои тандурустӣ иштирок намуданд.
Зимни ҷаласа вазъи омодагии муассисаҳои тандурустӣ ва ҳифзи иҷтимоии аҳолӣ ба давраи тирамоҳу зимистони солҳои 2023-2024 дар ВМКБ, вилоятҳои Суғду Хатлон ва марказҳои ҷумҳуриявӣ таҳлил ва баррасӣ гардиданд.
Дар ин робита, аз ҷониби Раёсати иқтисодӣ ва банақшагирии буҷети соҳаҳои тандурустии вазорат оид ба омодагии муассисаҳои тандурустӣ ва ҳифзи иҷтимоии аҳолии кишвар ба давраи болозикр маълумот пешниҳод гардид.
Ҳамзамон, дар ҷаласа доир ба сатҳи омодагии муассисаҳои соҳавӣ ба зимистонгузаронӣ аксу наворҳо низ пешниҳод карда шуд.
Дар охир аз ҷониби вазири тандурустӣ ва ҳифзи иҷтимоии аҳолии мамлакат Ҷамолиддин Абдуллозода ба масъулин ҷиҳати бартараф намудани мушкилоту камбудиҳои дар ин самт ҷойдошта дастуру супоришҳои мушаххас дода шуд.