Дар асоси дастуру супоришҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон 24 августи соли равон Сарвазири мамлакат Қоҳир Расулзода дар ноҳияҳои Темурмалик ва Восеи вилояти Хатлон дар расми ифтитоҳи як зумра иншооти таъйиноти гуногун иштирок намуда, бо вазъи корҳои сохтмонӣ дар иншооти дигар шинос шуд. Дар ноҳияи Темурмалик бо иштироки Сарвазир ва ҳайати Ҳукумат биноҳои хобгоҳи Гимназияи давлатии ба номи Ҳокимшо Ҳафизов, маҷмааи варзишӣ, Қасри фарҳанг, осоишгоҳи «Нигорамоҳ», шуъбаи Кумитаи давлатии амнияти миллии Ҷумҳурии Тоҷикистон ифтитоҳ гардиданд.
Дар ҳудуди ноҳияи Темурмалики вилояти Хатлон бо иштироки Сарвазири мамлакат Қоҳир Расулзода, Вазири тандурустӣ ва ҳифзи иҷтимоии аҳолии Ҷумҳурии Тоҷикистон Насим Олимзода ва дигар ҳайати Ҳукумат дуюмин осоишгоҳи истироҳативу табобатиӣ мавриди истифода қарор гирифт. Осоишгоҳи «Нигорамоҳ» аз ҷониби соҳибкори маҳаллӣ Имомалӣ Мақсудов бунёд шуда, хизматрасониҳои тиббӣ дар он мувофиқ ба талаботи замони муосир ба роҳ монда шудааст. Бино дуошёна буда, дар як вақт имкон дорад 80 нафарро қабул намояд. Дар ин Осоишгоҳи истироҳативу табобатӣ беморони гирифтори маризиҳои асаб, сутунмӯҳра, буғумдард ва бемориҳои дарунӣ аз ҷониби 25 нафар мутахассисони соҳибмаълумот табобат карда мешаванд.
Ҳамзамон дар рафти сафари ҳайати Ҳукумат ба ноҳияҳои Темурмалик ва Восеи вилояти Хатлон дар ноҳияи Восеъ беморхонаи навбунёд, ки аз ҷониби соҳибкорони ватанӣ бунёд гардидааст, мавриди истифода қарор дода шуд.
![](https://moh.tj/wp-content/uploads/2018/04/8678.jpg")
