Вазорати тандурустӣ ва ҳифзи иҷтимоии аҳолии Ҷумҳурии Тоҷикистон

Санаи 02 октябри соли равон дар толори маҷлисгоҳи бинои Вазорати тандурустӣ  ва ҳифзи иҷтимоии   аҳолии Ҷумҳурии Тоҷикистон оид ба масъалаҳои муқовимат нисбати амалҳои коррупсионӣ, дар амал тадбиқ намудани Қонуни Ҷумҳурии Тоҷикистон «Дар бораи танзими анъана ва ҷашну маросимҳо дар Ҷумҳурии Тоҷикистон» ва  бо мақсади ба танзим даровардани сару либоси ягонаи тиббии кормандони муассисаҳои тандурустӣ ва ҳифзи иҷтимоии аҳолии Ҷумҳурии Тоҷикистон, ҷамъомад баргузор гардид.

Дар чорабинии мазкур  Насим Олимзода, вазири  тандурустӣ ва ҳифзи иҷтимоии аҳолии Ҷумҳурии Тоҷикистон, сардорони раёсатҳои тандурустии мақомоти иҷроияи маҳаллии ҳокимияти давлатии Вилояти Мухтори Кӯҳистони Бадахшон, вилоятҳои Хатлону Суғд, шаҳри Душанбе, ректорон ва директорони муассисаҳои давлатии таълимии тиббӣ, директорони пажӯҳишгоҳҳо ва муассисаҳои ҷумҳуриявӣ, сартабибони беморхонаҳои марказии ноҳияҳои тобеи ҷумҳурӣ, роҳбарони шабакаи муассисаҳои кӯмаки аввалияи тиббию санитарӣ иштирок намуданд.

Насим Олимзода зимни баромади хеш вобаста ба масъалаҳои муқовимат нисбати амалҳои коррупсионӣ   ҳозиринро аз зарари номатлуби ин зуҳурот дар ҷомеа  ва зарари манфӣ  доштани он дар пешрафту шукуфоии давлат ҳушдор дода, ҳамчунин вобаста ба  роҳу усулҳои пешгирӣ намудани омилҳои коррупсионӣ, дарки амиқи зарару оқибатҳои ногувори он маълумот дода ҷамъомадагонро ба  иҷрои бечунучарои талаботи қонунгузории зиддикоррупсионӣ ва дар амал татбиқ намудани он  даъват намуд.

Дар чорабинии мазкур ҳамзамон сардорони раёсатҳои тандурустии мақомоти иҷроияи маҳаллии ҳокимияти давлатии вилоятҳои ҷумҳурӣ,  шаҳри Душанбе,   директорони пажӯҳишгоҳҳо ва муассисаҳои ҷумҳуриявӣ, сартабибони беморхонаҳои марказии ноҳияҳои тобеи ҷумҳурӣ, роҳбарони шабакаи муассисаҳои кӯмаки аввалияи тиббию санитарӣ вазифадор карда шуданд, ки дар муҳлати начандон тулонӣ   ҷиҳати таъмин гардидани кормандони соҳаи тандурустӣ бо либоси   ягонаи кормандони тиббӣ мусоидат намоянд.