Имрӯз дар меҳмонхонаи «Шератон» воқеъ дар пойтахти кишвар шаҳри Душанбе тибқи нақшаи кории якҷояи Вазорати тандурустӣ ва ҳифзи иҷтимоии аҳолии Ҷумҳурии Тоҷикистон, намояндагиҳои Ташкилоти умумиҷаҳонии тандурустӣ, Хазинаи кӯдакони Созмони Милали Муттаҳид ва Барномаи рушди Созмони Милали Муттаҳид дар Ҷумҳурии Тоҷикистон оид ба татбиқи Лоиҳаи Алянси глобалии ваксинаҳо ва иммунизатсия “Устувор намудани соҳаи тундурустӣ дар Ҷумҳурии Тоҷикистон” барои солҳои 2018-2019 баргузор гардид.
Дар кори чорабинӣ Саида Умарзода, муовини якуми вазири тандурустӣ ва ҳифзи иҷтимоии аҳолии Ҷумҳурии Тоҷикистон, Игор Поканевич, кормандони масъули дастгоҳи марказии вазорат, роҳбари намояндагии Ташкилоти умумиҷаҳонии тандурустӣ дар Тоҷикистон, намояндагони сохторҳои марбутаи Вазорати тандурустӣ ва ҳифзи иҷтимоии аҳолии Ҷумҳурии Тоҷикистон, доираи васеи кормандони марказҳои ҷумҳуриявии иммунопрофилактика иштирок намуданд.
Дар чорабинии мазкур гуфта шуд, ки мақсади аслии татбиқи Лоиҳаи мазкур тақвияти иқтидори кумаки аввалияи тиббиву санитарӣ бо таваҷҷӯҳи хосса ба сифат ва бехатарии хизматрасонӣ дар самти иммунизатсия дониста мешавад.
Саида Умарзода зимни баромади хеш аз ҷумла иброз намуд, ки; “Дар баробари дастгириҳои пайвастаи шарикони рушд, давра ба давра бо зиёд гардидани шумораи аҳолии Ҷумҳурии Тоҷикистон ваксинакунонии кӯдакон яке аз масъалаи мубрами ҷомеаи имрӯза маҳсуб ёфта, таваҷҷӯҳ ва назари хайрхоҳонаи Ҳукумати Ҷумҳурии Тоҷикистон низ дар ин самт назаррас мебошад. Ҳамин аст, ки сол ба сол ҳаҷми маблағи аз буҷҷет ҷудошаванда барои харидории ваксинаҳо бештар мегардад”.
Дар чорабинии мазкур, ҳамзамон нақшаи кории якҷояи Вазорати тандурустӣ ва ҳифзи иҷтимоии аҳолии Ҷумҳурии Тоҷикистон, намояндагиҳои Ташкилоти умумиҷаҳонии тандурустӣ, Хазинаи кӯдакони Созмони Милали Муттаҳид ва Барномаи рушди Созмони Милали Муттаҳид дар Ҷумҳурии Тоҷикистон оид ба татбиқи Лоиҳаи Алянси глобалии ваксинаҳо ва иммунизатсия “Устувор намудани соҳаи тундурустӣ дар Ҷумҳурии Тоҷикистон” барои солҳои 2018-2019 баррасӣ гардида, вазифаҳо ҷиҳати фаъолият таи солҳои зикргардида натиҷагирӣ карда шуданд.