Имрӯз, 12 марти соли равон дар Вазорати тандурустӣ ва ҳифзи иҷтимоии аҳолии Ҷумҳурии Тоҷикистон муаррифии барномаи тандурустии Иттиҳоди Аврупо дар Тоҷикистон барои солҳои 2021-2025 баргузор гардид, ки дар он вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода, Виктор Олчавски, роҳбари Намояндагии Ташкилоти умумиҷаҳонии тандурустӣ дар Ҷумҳурии Тоҷикистон, Осама Маккави, Намояндаи Хазинаи кӯдакони СММ (ЮНИСЕФ) дар Тоҷикистон ва Намояндаи Ҷамъияти Олмонӣ оид ба ҳамкории техникӣ (GIZ) дар Тоҷикистон иштирок намуданд.
Ҷамолиддин Абдуллозода, вазири тандурустӣ ва ҳифзи иҷтимоии аҳолии Ҷумҳурии Тоҷикистон зимни мулоқот аз ҳамкориҳои мутақобилан судманди вазорат бо шарикони рушд дар самти баланд бардоштани сатҳ ва сифати хизматрасонии тиббӣ дар кишвар ёдовар шуда, аз ҷумла иброз дошт, ки барномаи тандурустии Иттиҳоди Аврупо дар Тоҷикистон барои солҳои 2021-2025 идомаи ҳамкориҳои мутақбилан судманди вазорат бо ин ниҳод мебошад.
Зикр гардид, ки ҳадафи барномаи мазкур кӯмак расонидан ба фарогирии ҳамаҷонибаи тандурустӣ дар Тоҷикистон дар доираи Стратегияи миллии рушди соҳаи тандурустӣ барои солҳои 2010-2030 ба шумор меравад.
Бояд гуфт, ки барномаи тандурустии Иттиҳоди Аврупо дар Ҷумҳурии Тоҷикистон барои солҳои 2021-2025 аз ҷониби Ташкилоти умумиҷаҳонии тандурустӣ дар Ҷумҳурии Тоҷикистон, Хазинаи кӯдакони СММ (ЮНИСЕФ) дар Тоҷикистон ва Ҷамъияти Олмонӣ оид ба ҳамкории техникӣ (GIZ) дар Тоҷикистон дар якҷоягӣ бо Вазорати тандурустӣ ва ҳифзи иҷтимоии аҳолии Ҷумҳурии Тоҷикистон амалӣ карда мешавад.
Барномаи мазкур се самт: Тақвияти идоракунии соҳаи тандурустӣ ва механизмҳои маблағгузорӣ бо таваҷҷӯҳ ба кӯмаки аввалияи тиббию санитарӣ, баланд бардоштани дастрасии сифати маҷмӯи кӯмаки аввалияи тиббию санитарӣ, назорати самараноки системаи пешгирии бемориҳои сироятӣ дар тамоми системаи расонидани кӯмаки тиббӣ, аз ҷумла вокуниш ба буҳрони бемории COVID-19-ро дарбар мегирад.