Расонидани хизматрасонии босифати тиббӣ ба модарон ва кӯдакон яке аз самтҳои муҳими фаъолияти Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ба шумор рафта, дар ин самт пайваста тадбирҳои муҳим амалӣ карда мешаванд.
Дар ин росто, қайд намудан ба маврид аст, ки бо мақсади беҳтар намудани хизматрасонии босифати тиббӣ ба модарон ва кӯдакон ва пешгирии фавти онҳо ҳар ҳафта дар Вазорати тандурустӣ ва ҳифзи иҷтимоии аҳолии Ҷумҳурии Тоҷикистон бо иштироки роҳбарияти вазорат ва мутахассисони варзидаи соҳа машваратӣ онлайнӣ доир мегардад, ки дар он роҳбарон ва намояндагони таваллудхонаҳои шаҳру ноҳияҳои кишвар ба тариқи онлайн иштирок менамоянд.
Зимни ҷаласаҳои машваратии онлайнӣ аз ҷониби мутахассисони соҳа доир ба пешгирии фавти модар ва кӯдак ба кормандони таваллудхонаҳо дастуру супоришҳои мушаххас дода мешавад.
Бояд гуфт, ки ҳадаф аз баргузории чунин машваратҳои онлайнӣ ин пеш аз ҳама беҳтар намудани хизматрасонии тиббӣ ба модарон ва кӯдакон ва пешгирии фавти онҳо, пешниҳоди тавсияҳои муфид аз ҷониби мутахассисони варзидаи соҳа ба акушер-гинекологҳо дар ҷиҳати боз ҳам беҳтар намудани фаъолият ва дигар масъалаҳо ба шумор меравад.
![](https://moh.tj/wp-content/uploads/2018/04/8678.jpg")
