Масъулини беморхонаи клиникии вилоятии ба номи Абдулмаҷид Ҳақназарови шаҳри Кӯлоб ба мавсими тирамоҳу зимистони солҳои 2021-2022 ҳамаҷониба омодагӣ дида, то ин муддат ба маблағи 14000 сомонӣ 600 л сӯзишворӣ, 4 адад генератор, 175 адад печҳои барқӣ, 406 адад рахти хоб ва дигар мавод захира намудаанд, хабар медиҳад мухбири минтақавии АМИТ «Ховар».
Бино ба иттилои сардухтури беморхона Ниёзмад Шомадов, беморхона дорои 450 адад таҷҳизоти тиббӣ буда, айни ҳол 270 нафар бемор ба муолиҷа фаро гирифта шудаанд. Дар беморхона 970 нафар фаъолият дошта, аз онҳо 125 нафар табибони дорои маълумоти олӣ ва 486 нафар ҳамшираҳои шафқат мебошанд.
Дар беморхона шароити хизматрасонӣ хуб ба роҳ монда шуда, бо дастгирии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон таҷҳизоти зарурӣ сари вақт дастрас карда мешавад.
АКС: АМИТ «Ховар»
![](https://moh.tj/wp-content/uploads/2018/04/8678.jpg")
