Таҳти роҳбарии муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон Абдухолиқ Амирзода дар беморхонаҳои марказии як қатор шаҳру ноҳияҳои тобеи ҷумҳурӣ, аз ҷумла шаҳри Ваҳдат, ноҳияҳои Рашт ва Файзобод ҷаласаҳои корӣ баргузор гардид, ки дар он роҳбарият ва кормандони муассисаҳои тиббию табобатии шаҳру ноҳияҳои мазкур иштирок намуданд.
Зимни ҷаласаҳои корӣ муовини вазири тандурустӣ ва ҳифзи иҷтимоии аҳолӣ таваҷҷуҳи масъулинро ба пешгирии омилҳои коррупсионӣ, фавт, бемориҳои сироятиву ғайрисироятӣ, ВНМО, сил ва дигар масъалаҳои алоқаманди соҳа ҷалб намуд.
Дар ҷаласаҳои мазкур ҳамзамон вазъи кунунии хизматрасонии тиббӣ ба аҳолӣ дар муассисаҳои тандурустии шаҳри Ваҳдат ва ноҳияҳои Рашту Файзобод мавриди таҳлил ва баррасии амиқ қарор дода шуда, баҳри бартараф намудани мушкилот ва камбудиҳои ҷойдошта аз ҷониби Абдухолиқ Амирзода, муовини вазири тандурустӣ ва ҳифзи иҷтимоии аҳолӣ дастуру супоришҳои мушаххас дода шуд.
Қайд кардан ба маврид аст, ки имрӯзҳо дар муассисаҳои тандурустии шаҳру ноҳияҳои тобеи ҷумҳурӣ, аз ҷумла дар шаҳри Ваҳдат ва ноҳияҳои Рашту Файзобод дар самти ташхис ва табобати шаҳрвандон тамоми шароит ва имконоти мусоид фароҳам оварда шудааст.
![](https://moh.tj/wp-content/uploads/2018/04/8678.jpg")
