Имрӯз, 14 майи соли равон таҳти роҳбарии муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон Шодихон Ҷамшед бо иштироки кормандони як қатор марказҳои ҷумҳуриявӣ ҷаласаи корӣ баргузор гардид, ки дар он масъалаи фаъолияти телефонҳои боварии марказҳои саломатии пойтахт ва бо мутахассисони баландихтисос таъмин намудани онҳо мавриди баррасӣ қарор гирифт.
Зикр гардид, ки ҳадаф аз таъсис додани телефонҳои боварӣ дар назди марказҳои саломатии пойтахт саривақт расидагӣ намудан ба муроҷиати шаҳрвандон ва ҳамзамон фавран расонидани ёрии аввалияи тиббӣ ба беморон мебошад.
Ҳамзамон, таъкид карда шуд, ки бояд масъули телефонҳои боварии марказҳои саломатӣ мутахассисоне таъйин карда шаванд, ки тавонанд ба муроҷитакунандагон тавсияҳои дуруст ва дақиқ пешниҳод намоянд.
Маврид ба ёдоварист, ки бо мақсади саривақт расонидани ёрии аввалияи тиббӣ дар назди марказҳои саломатии шаҳри Душанбе телефонҳои боварӣ ба тариқи шабонарӯзӣ фаъолият доранд.
Шаҳрвандон метавонанд дар ҳолати пайдо шудани нишонаҳои сирояти коронавирус дар хеш ба табибони оилавии минтақаи хеш ва ё ба телефонҳои боварии маркази саломатии маҳалли худ занг бизананд.
Ҳамзамон, айни ҳол дар назди Вазорати тандурустӣ ва ҳифзи иҷтимоии аҳолии Ҷумҳурии Тоҷикистон вобаста ба масъалаҳои коронавирус телефонҳои боварии 511 ва 311 фаъолияти шабонарӯзӣ доранд, ки шаҳрвандон метавонанд оид ба масъалаи мазкур ба онҳо муроҷиат намоянд.