Вазорати тандурустӣ ва ҳифзи иҷтимоии аҳолии Ҷумҳурии Тоҷикистон

Дар Маркази назорати давлатии санитарию эпидемологии шаҳри Хуҷанд бо мақсади пешгирӣ аз мавҷи дигарбораи бемории сироятии COVID–19 силсилаи мулоқотҳо бо қишрҳои гуногуни ҷомеа, аз ҷумла маориф, тандурустӣ, марказҳои савдо, кумитаи маҳаллаҳо ва ғайраҳо баргузор гардид.

Таҳмина Усмонова, сардори Маркази назорати давлатии санитарию эпидемологии шаҳри Хуҷанд мулоқотро ифтитоҳ намуда, ҳозиринро бо вазъи ҷойдоштаи  ин беморӣ дар давлатҳои минтақа шинос намуд.

Аз ҷумла таъкид гардид, ки дар кишвари Ҳиндустон бо ҳисоби миёна дар як шабонарӯз ба ин беморӣ 366 494 нафар сироят ёфта, аз ин миқдор дар як шаб 4000 нафар фавтида истодаанд. Чунин вазъи нигаронкунанда дар давлатҳои ҳамсояи мо Ӯзбекистон, Қирғизистон ва Қазоқистон низ ҷой дорад.

Тахмина Усмонова афзуд, ки ҳарчанд аз оғози сол бемории короновирус дар Тоҷикистон ба қайд гирифта нашуда бошад ҳам, аз ҷониби Вазорати тандурустӣ ва ҳифзи ичтимоии аҳолии Ҷумҳурии Тоҷикистон, Мақомоти иҷроияи ҳокимияти давлатии вилояти Суғд ва шаҳри Хуҷанд вобаста ба пешгирӣ аз интиқолшавии ин беморӣ пайваста чораандешӣ карда мешавад.

Мавсуф диққати раисони маҳаллаҳо ва масъулини соҳаи маорифро баҳри ҳамкории доимӣ бо марказҳои саломатӣ ҷалб намуда, аз онҳо даъват ба амал овард, ки дар кору таҳсил ҳатман қоидаҳои гигиенаи ҷамъиятиро риоя намоянд.

Зикр гардид, ки ягона роҳи асосии сироят наёфтан ба бемории короновирус эҳтиёткориро пеша намудан аст, зеро, омили асосии паҳн гаштани ин беморӣ дар миёни ҷомеа сироятёбӣ аз шахси мубталои беморӣ ба инсони солим мебошад. Ин бемории марговар бо роҳи қатраӣ – ҳавоӣ, алоқаи наздик, яъне дасти ҳамдигар фишурдан, оғӯш гирифтан, даст расондан ба ашёву маводе, ки онҳо бо вирус олудаанд ва риоя накардани гигиенаи шахсӣ паҳн мешавад. Аз ин рӯ, роҳҳои асосии пешгирии ин ҳолат риояи гигиенаи шахсӣ, истифода аз ниқобҳои тиббӣ ва маҳлулҳои антисептикӣ, тоза нигоҳ доштани муҳити зист, пайваста шӯстани дастон бо собун ва риояи фосила маҳсуб меёбанд.

Таҳмина Усмонова изҳори нигаронӣ намуд, ки мутаассифона айни ҳол на ҳамаи сокинони шаҳр чунин талаботи ҳатмиро риоя мекунанд. Тавре аз мушоҳидаҳо бармеояд, имрӯзҳо аксар вақт дар ҷойҳои ҷамъиятӣ ва серодам, бахусус дар бозорҳо, нақлиёти ҷамъиятӣ ҳолати бениқоб гаштугузор кардани шаҳрвандон ва риоя накардани фосилаи иҷтимоӣ ба назар мерасад, ки аз беэҳтиётии шаҳрвандон дар самти пешгирии ин беморӣ дарак медиҳад.

Дар анҷоми мулоқот роҳбарону масъулини дахлдор вазифадор карда шуданд, ки дар самти ҷилавгирӣ аз сирояти бемории короновирус тамоми шароити заруриро муҳайё  намуда, чораҳои пешгирикунандаи онро боз ҳам пурзӯр намоянд.