Вазорати тандурустӣ ва ҳифзи иҷтимоии аҳолии Ҷумҳурии Тоҷикистон

Дар миёни 236 нафар шаҳрванде, ки аввалҳои моҳи феврали соли равон аз Ҷумҳурии Мардумии Чин ба Ҷумҳурии Тоҷикистон ворид шудаву дар Беморхонаи клиникии шаҳрии бемориҳои сироятии шаҳри Душанбе бистарӣ гардидаанд, сирояти коронавирус ба қайд гирифта нашудааст.

Дар ин бора Хуршед Ҳабибзода, сартабиби Беморхонаи клиникии шаҳрии бемориҳои сироятии шаҳри Душанбе ба moh.tj  иттилоъ дод.

Номбурда ҳамзамон қайд намуд, ки аз ин шумора 34 нафарашон шаҳрвандони Ҷумҳурии Мардумии Чин мебошанд, ки дар Тоҷикистон кор мекунанд.

Бино ба гуфти ӯ, айни замон бистаришудагон бо се вақт хӯроки гарм таъмин буда, дар назар аст, ки онҳо 15 феврали соли равон ба хонаҳояшон ҷавоб дода шаванд.

Қайд намудан ба маврид  аст, ки то имрӯз беш аз 700 нафар шаҳрванди аз Ҷумҳурии Мардумии Чин ба Ҷумҳурии Тоҷикистон воридшуда дар беморхонаҳои сироятии мамлакат бистарӣ гардида, ба ҳолати карантинӣ фаро гирифта шудаанд. Хушбахтона, то кунун дар миёни онҳо ягон ҳолати гирифторшавӣ ба сирояти коронавирус ба қайд гирифта нашудааст.

Айни замон бо мақсади пешгирии сирояти коронавирус Вазорати тандурустӣ ва ҳифзи иҷтимоии аҳолии Ҷумҳурии Тоҷикистон дар гузаргоҳҳои сарҳадӣ ва фурудгоҳҳои байналмилалии мамлакат чораҳои пешгирикунандаро пурзӯр намуда, дар ин самт фаъолияти шабонарӯзӣ дорад.