Ректори Донишгоҳи давлатии тиббии Тоҷикистон ба номи Абӯалӣ ибни Сино профессор Маҳмадшоҳ Гулзода бо сафири фавқулодда ва мухтори Покистон дар Ҷумҳурии Тоҷикистон Имрон Ҳайдар мулоқот намуд, ки дар он дурнамои ҳамкориҳои мутақобилан судманди донишгоҳ бо муассисаҳои таҳсилоти олии тиббии Покистон мавриди баррасӣ қарор гирифтанд.
Дар рафти мулоқот ҷаноби Имрон Ҳайдар ҳавасмандии ҷониби Покистонро барои таҳсили шаҳрвандони ин кишвар дар Донишгоҳи давлатии тиббии Тоҷикистон ба номи Абӯалӣ ибни Сино иброз намуда, ҳамзамон, қайд намуд, ки таваҷҷуҳи шаҳрвандони Покистон ҷиҳати таҳсил дар ин донишгоҳи олии тиббӣ сол аз сол меафзояд.
Ректори Донишгоҳи давлатии тиббии Тоҷикистон ба номи Абӯалӣ ибни Сино профессор Маҳмадшоҳ Гулзода зимни мулоқот иброз дошт, ки дар донишгоҳ солҳои охир барои таҳсил ва зисти шаҳрвандони хориҷӣ тамоми шароитҳо фароҳам оварда шудаанд ва аз соли таҳсили оянда донишгоҳ омода аст, ки як қисм шаҳрвандони ин кишварро ба таҳсилоти олии тиббӣ фаро гирад.
Суҳбат дар фазои якдигарфаҳмӣ ва ҳусни тафоҳум сурат гирифта, тарафҳо барои дар оянда боз ҳам беҳтар намудани ҳамкориҳо ба тавофуқ расиданд.
![](https://moh.tj/wp-content/uploads/2018/04/8678.jpg")
