Вазорати тандурустӣ ва ҳифзи иҷтимоии аҳолии Ҷумҳурии Тоҷикистон

Дар ҷараёни сафари кории муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон Шодихон Ҷамшед ба Вилояти Мухтори Кӯҳистони Бадахшон ду Маркази саломатӣ дар ноҳияи таҷрибавии Ишкошим, ки аз тарафи Лоиҳаи «Беҳтаркунии хизматрасонии тиббӣ”-и назди Вазорати тандурустӣ ва ҳифзи иҷтимоии аҳолии Ҷумҳурии Тоҷикистон, бо дастгирии молиявии Бонки умумиҷаҳонӣ сохта шудаанд, мавриди истифода қарор  гирифтанд.

Шодихон Ҷамшед, муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон аснои ба истифода додани марказҳои саломатии мазкур аз таваҷҷуҳи Асосогузори сулҳу ваҳдати миллӣ, Пешвои миллат, Президенти Ҷумҳурии Тоҷикистон мӯҳтарам Эмомалӣ Раҳмон ба соҳаи тандурустӣ ёдовар шуда, ба истифода додани иншоотҳои мазкурро самараи   таваҷҷуҳи хосаи Роҳбарияти олии Ҳукумати кишвар ба соҳа арзёбӣ намуд.

Қайд гардид, ки баъди ба даст овардани Истиқлолияти давлатӣ соҳаи тандурустӣ дар ВМКБ ба таври бесобиқа рушд намуда, дар ин давра дар вилоят беморхонаву марказҳои саломатӣ ва дигар иншоотҳои тандурустии зиёд сохта ба истифода дода шуданд.

Яке аз чунин иншоотҳои замонавӣ дар деҳаи Вранги ноҳияи Ишкошим ба истифода дода шуд. Маркази саломатии деҳоти Вранги ноҳияи Ишкошим бо таҷҳизоту лавозимотҳои тиббӣ, мебел, таҷҳизотҳои ғайритиббӣ ва генератори дизели ба маблағи 2 001 125 сомонӣ, аз ҷумла корҳои сохтмониву васлкуни 16347000,46 сомонӣ,  таҷҳизоти тиббӣ 152653, 04 сомонӣ, мебел 106545,381 сомонӣ, занҷираи сард (холодовая цепь) 40566,00 сомонӣ ва генератори дизелӣ ( қувваи 12кВт) ва маҷмӯаи қисмҳои эхтиётӣ 66660,00 сомонӣ мавриди истифода қарор дода шуд.

Маркази саломатии мазкур дорои 11 ҳуҷра, аз ҷумла,  ҳуҷраи хатна, ташхисгоҳ, эмгузарониву доругузаронӣ, табиби оилавӣ, бақайдгирӣ, ҳуҷраҳои момодоя, анбор, ду ҳоҷатхона ва бухорихона(котелня) иборат аст.

Ҳамзамон, дар ҳудуди иншооти мазкур хона барои нақлиёти санитарӣ, се анбор, ду ҳоҷатхона, манораи обфишор, ҳавзи оташхомӯшкунӣ, трансформатори барқӣ ва инсинератор барои сӯзондани партовҳои тиббӣ ҷойгир аст.

Маркази саломатии деҳоти Вранг ба маблағи 282 000 сомонӣ бо нақлиёти санитарии Foton CLW5039XJH-C5 ва  маҷмӯаи қисмҳои эҳтиётӣ таъмин карда шудааст.

Маркази саломатии деҳоти Зонги ноҳияи Ишкошими вилоят  бо таҷҳизоту лавозимотҳои тиббӣ, мебел, таҷҳизотҳои ғайритиббӣ ва генератори дизелӣ ба маблағи 1 871 813 сомонӣ, аз ҷумла корҳои сохтмониву васлкунӣ 1505388, 56 сомонӣ , таҷҳизоти тиббӣ 152653, 04 сомонӣ, мебел 106545, 381 сомонӣ, занҷираи сард (холодовая цепь) 40566,00 сомонӣ ва генератори дизелӣ (қувваи 12 кВт ) ва маҷмӯаи қисмҳои эҳтиётӣ 66660,00 сомонӣ мавриди истифода қарор дода шуд.

Бинои асоси иншооти мазкур дорои 11 ҳуҷра, ҳуҷраи хатна, ташхисгоҳ, эмгузарониву доругузаронӣ, табиби оилавӣ, бақайдгирӣ, ҳуҷраҳои момодоя, анбор, ду ҳоҷатхона ва бухорихона (котелная) иборат аст.

Дар ҳудуди иншоот хона барои нақлиёти санитарӣ, се анбор, ду ҳоҷатхона, манораи обфишор, ҳавзи оташхомӯғшкунӣ ва печка барои сӯзондани партовҳои тиббӣ ҷойгир аст.

Инчунин, Маркази саломатии деҳоти Зонг ба маблағи 282 000 сомонӣ  бо нақлиёти санитарии  Foton CLW5039XJH-C5 ва маҷмӯаи қисмҳои эҳтиётӣ таъмин  карда шудааст.