Тибқи дастури Вазорати тандурустӣ ва ҳифзи иҷтимоии аҳолии Ҷумҳурии Тоҷикистон Муассисаи давлатии “Маҷмааи тандурустии Истиқлол” барои дар ҳолатҳои зарурӣ ба карантин фаро гирифтани шаҳрвандон омода мешавад.
Иқдоми мазкур бо мақсади дар шароити хуб ба карантин фаро гирифтани шаҳрвандон рӯи кор гирифта шуда, ба ҷуз аз ташхисгоҳ дигар ҳамаи шӯъбаҳои муассисаи мазкур барои ба карантин фаро гирифтани шаҳрвандони аз хориҷи кишвар ба Тоҷикистон воридшуда омода карда мешаванд.
Бемороне, ки вазъи саломатияшон беҳтар мешавад, аз беморхонаи мазкур ҷавоб дода шуда, нафарони дар муолиҷа қарордошта пас аз сиҳат шудан ба хонаҳояшон рухсат дода мешаванд.
Ҳамзамон, маврид ба зикр аст, ки айни ҳол дар муассисаи мазкур барои табибон семинарҳо вобаста ба пешгирии сирояти коронавирус гузаронида мешавад.
Бояд гуфт, ки то кунун дар ин муассиса як миқдор мавод ва молҳои тиббӣ, аз ҷумла ниқоб, либосҳои махсус, хлор, дастпӯшак ва маводҳои зиддивирусӣ барои пешгирии сирояти коронавирус захира карда шудаанд.