Бо мақсади суҳбати озоду ошкоро анҷом додан бо шаҳрвандон ва расидагӣ намудан ба масъалаву мушкилоти онҳо доир ба масъалаҳои тандурустӣ ва ҳифзи иҷтимоии аҳолӣ тибқи супориши вазири тандурустӣ ва ҳифзи зиҷтимоии аҳолии Ҷумҳурии Тоҷикистон гурӯҳи кории Вазорати тандурустӣ ва ҳифзи иҷтимоии аҳолии мамлакат таҳти роҳбарии муовини вазир Абдухолиқ Амирзода иборат аз сармутахассисон, мутахассисон ва намояндагони хадамотҳои соҳавии пойтахт ба шаҳри Кӯлоб сафар намуд.
Дар шӯъбаи Раёсати тандурустии вилояти Хатлон оид ба шарҳу навоҳии минтақаи Кӯлоб қабули сайёри сокинони шаҳри Кӯлоб аз ҷониби гурӯҳи кории вазорат баргузор гардида, дар ҷараёни он муовини вазир ва мутахассисони варзидаи соҳаҳои гуногуни тандурустӣ бо шаҳрвандон суҳбати озоду ошкоро анҷом доданд.
Баъд аз шунидани муроҷиати шаҳрвандон ҷиҳати ҳалли масъалаҳои эшон аз ҷониби муовини вазири тандурустӣ ва ҳифзи иҷтимоии аҳолии мамлакат ба масъулини раёсати тандурустии минтақаи Кӯлоб дастуру супоришҳои мушаххас дода шуд.
Инчунин, пас аз қабули сайёри сокинон мутахассисони соҳаҳои гуногуни тибби пойтахт бо табибони минтақаи Кӯлоб доир ба пешгирии бемориҳои гуногун мубодилаи афкор намуданд.
Қайд кардан ба маврид аст, ки дар сиёсати давлат ва Ҳукумати мамлакат беҳтар намудани сатҳ ва сифати хизматрасонии тиббӣ ба аҳолӣ яке аз самтҳои муҳим ба шумор рафта, ҷиҳати фароҳам овардани шароити арзандаи фаъолият барои табибони кишвар имрӯзҳо дар муассисаҳои тандурустӣ шароит ва имконоти мусоид муҳайё карда шудааст.