Дар таваллудхонаи вилояти Суғд бо мақсади дар амал татбиқ намудани дастуру супоришҳои Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ва Хадамоти назорати давлатии санитарию эпидемиологӣ ҷиҳати пешгирӣ аз паҳншавии бемориҳои сироятии дохилибеморхонагӣ бо иштироки кормандони Маркази назорати давлатии санитарию эпидемологии вилоят семинар-машварат баргузор гардид.
Чорабиниро директори Маркази назорати давлатии санитарию эпидемиологии вилояти Суғд Таҳмина Усмонова оғоз намуда, нахуст вобаста ба фармоишҳои Вазорати тандурустӣ ва ҳифзи иҷтимоии аҳолии Ҷумҳурии Тоҷикистон «Оид ба пешгирии бемориҳои сироятӣ дар муассисаҳои тандурустии Ҷумҳурии Тоҷикистон», «Оид ба пешгирии бемориҳои сироятии дохилибеморхонагӣ дар таваллудхонаҳо» шарҳи муфассал дода, ҳамзамон доир ба раванди безараргардонии асбобҳои тиббӣ, банду басти асбобҳои тиббӣ дар дохили биксҳо ва қоидаҳои гузаронидани автоклавкунонӣ маълумот дода, аз кормандони таваллудхонаи вилоятӣ даъват ба амал овард, ки ҷиҳати иҷрои сифатноки фармоишҳои зикргардида тадбирҳои фаврӣ ва амалӣ андешанд, зеро риоя накардани муқаррароти пешбинишуда ба саломатии модару кўдак хатар эҷод менамояд.
Таъкид шуд, ки ҳадаф аз гузаронидани чунин машваратҳо-ин пеш аз ҳама баланд бардоштани савияи дониши кормандони соҳа ва пешгирии бемориҳои сироятӣ дар таваллудхонаҳо мебошад.
![](https://moh.tj/wp-content/uploads/2018/04/8678.jpg")
