Вазорати тандурустӣ ва ҳифзи иҷтимоии аҳолии Ҷумҳурии Тоҷикистон

Рӯзи 5 июни соли равон аз ҷониби “Ҳамкории боздошти сил дар Тоҷикистон” ба як қатор муассисаҳои тандурустӣ ва фурӯшгоҳҳои кишвар китобчаи “Маслиҳатҳо барои мубориза бо изтироби коронавирус” тақсим карда шуд.

Ин китобча дар ҳамкорӣ бо Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ва Гурӯҳи кории иборат аз мутахассисони Марказҳои ҷумҳуриявию шаҳрии ҳимояи аҳолӣ аз бемории сил, Муассисаи давлатии  “Маркази ташаккули тарзи ҳаёти солим”, коршиносони соҳа ва намояндагони ташкилотҳои ҷамъиятӣ таҳия гардида, ҷанбаҳои беҳдоштӣ, равониву иҷтимоии бемории коронавирусро фаро гирифтааст.

Теъдоди бештари китобча ҷиҳати дастрасии аҳолӣ ба Муассисаи давлатии “Маркази ташаккули тарзи ҳаёти солим”, Марказҳои ҷумҳуриявию шаҳрии ҳимояи аҳолӣ аз бемории сил, Муассисаи давлатии  “Маркази миллии бемориҳои сил, шуш ва ҷарроҳии қафаси сина”, Раёсати тандурустии шаҳри Душанбе, Беморхонаҳои ноҳиявии Фархор, Восеъ, Ҳамадонӣ, фурӯшгоҳҳои бузурги пойтахт, аз ҷумла гипермаркети “Ашан”, супермаркетҳои “Ёвар”, “Пайкар 2”, “Сафар”, “Пайкар 3”, “Диёр” ва “Би 1” тақдим карда шуд.

“Ҳамкории боздошти сил дар Тоҷикистон” минбаъд низ дар ҳамкорӣ бо Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ва сохторҳои он ба таҳияву нашри барномаҳои телевизиониву радиоӣ ва маводҳои иттилоотӣ-маърифатӣ идома медиҳад.