Дар асоси фармоиши вазири тандурустӣ ва ҳифзи иҷтимоии аҳолии Ҷумҳурии Тоҷикистон аз 30.10.2020, №852 “Дар бораи гузаронидани тадқиқот оид ба арзёбии вазъи обтаъминкунӣ, санитарӣ ва гигиенӣ дар муассисаҳои табобатию профилактикии Ҷумҳурии Тоҷикистон” аз 2 то 5 ноябри соли равон ҷиҳати анҷом додани тадқиқот оид ба арзёбии ҳолати обтаъминкунӣ, санитарӣ ва гигиенаи муассисаҳои табобатию профилактикӣ барои гурӯҳи тадқиқотчиён машғулияти омӯзишӣ бо назардошти чораҳои беҳдоштӣ ва зиддиэпидемикӣ гузаронида мешавад.
Машғулияти омӯзишӣ барои гурӯҳи тадқиқотчиён имрӯз, 2 ноябри соли равон дар меҳмонхонаи Серена оғоз гардид, ки дар кори он муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон Самариддин Ализода, аъзоёни гурӯҳ, намояндагони Ташкилоти Умумиҷаҳонии Тандурустӣ ва Агентии Ҷопон оид ба ҳамкориҳои байналмилалӣ (JICA) дар Тоҷикистон иштирок намуданд.
Бояд гуфт, ки аз 9 ноябр то 9 декабри соли равон дар муассисаҳои табобатию профилактикии шаҳру ноҳияҳое, ки тибқи методология интихоб ва ба руйхат дароварда шудаанд, тадқиқот оид ба арзёбии ҳолати обтаъминкунӣ, санитарӣ ва гигиенӣ бо назардошти маълумот ва қарорҳои Ситоди ҷумҳуриявӣ оид ба пурзӯр намудани чораҳои зиддиэпидемикӣ дар давраи пандемияи сирояти коронавирус (COVID-19) дар Ҷумҳурии Тоҷикистон, риояи чораҳои беҳдоштию зиддиэпидемикӣ гузаронида мешавад.
Гурӯҳи тадқиқотчиён пас аз анҷоми гузаронидани тадқиқот оид ба арзёбии ҳолати обтаъминкунӣ, санитарӣ ва гигиенаи муассисаҳои табобатию профилкатикӣ ба роҳбарияти Вазорати тандурустӣ ва ҳифзи иҷтимоии аҳолии Ҷумҳурии Тоҷикистон маълумоти муфассали таҳлилиро пешниҳод менамоянд.