Баъди ба анҷом расидани таъмири ороишӣ қисми таваллудхонаи Муассисаи давлатии “Маркази тиббии шаҳрии №1 ба номи Карим Ахмедов” ба фаъолияти муқаррарӣ оғоз намуд.
Зимни ба фаъолияти корӣ шурӯъ намудани қисми таваллудхонаи муассисаи мазкур муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон Зулфия Абдусаматзода, роҳбарияти Маркази тиббии шаҳрии №1 ба номи Ахмедов Карим ва кормандони таваллудхонаи маркази мазкур иштирок намуданд.
Муовини вазири тандурустӣ ва ҳифзи иҷтимоии аҳолии мамлакат Зулфия Абдусаматзода зимни суханронии хеш иброз намуд, ки ҳифзи саломатии модарон ва кӯдакон зери таваҷҷуҳи хосаи Ҳукумати кишвар, хосатан Пешвои муаззами миллат муҳтарам Эмомалӣ Раҳмон қарор дошта, баҳри таъмини саломатии модарон ва кӯдакон пайваста тадбирҳои муҳим амалӣ карда мешаванд.
Номбурда аз кормандони таваллудхонаи мазкур даъват ба амал овард, ки хизматрасонии тиббиро боз ҳам хубтару беҳтар ба роҳ монда, дар таъмини солимии модарон ва кӯдакон саҳми хешро гузоранд.