Рӯзҳои 24-25 июли соли равон дар шаҳри Москваи Федератсияи Россия таҳти унвони “Ҷомеаи солим” форум баргузор гардид.
Дар форуми мазкур масъалаҳои навсозии соҳа, рушди техналогияҳои инноватсионӣ, рақамикунонии соҳа, ҳифзи саломатии аҳолӣ, тарғиби ташаккули тарзи ҳаёти солим, навоварӣ дар табобат ва пешгирии бемориҳо, солимии равонӣ ва дигар масъалаҳо мавриди баррасӣ қарор дода шуданд.
Дар форуми “Ҷомеаи солим” зиёда аз 1000 нафар аз 17 кишвари ҷаҳон иштирок карданд. Ҷумҳурии Тоҷикистонро дар ин форум муовини якуми вазири тандурустӣ ва ҳифзи иҷтимоии аҳолии Ҷумҳурии Тоҷикистон Ғафур Муҳсинзода муаррифӣ намуд.
Зимни суханронии хеш Ғафур Муҳсинзода иброз дошт, ки ҳамкориҳои Ҷумҳурии Тоҷикистон ва Федератсияи Россия дар соҳаҳои гуманитарӣ ва иҷтимоӣ, татбиқи қоидаҳои Байналмилалии тиббию санитарӣ оид ба муқовимат ба бемориҳои сироятӣ, назорати эпидемиологӣ, тайёр кардани кадрҳои тиббӣ, инчунин расонидани ёрии махсуси тиббӣ ва дорусозӣ бо суръати баланд рушд мекунад.
Гуфта шуд, ки ба роҳ мондани робитаҳои мустақим байни вазоратҳои тандурустии ҳар ду кишвар ба рушди самараноки ҳамкориҳои дуҷониба дар соҳаи ҳифзи саломатии аҳолии мамлакат мусоидат хоҳад кард.