Имрӯз, 16 майи соли равон Вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода бо Вазири тандурустии Ҷумҳурии Белорус Караник Владимир Степанович суҳбати телефонӣ анҷом дод.
Бо назардошти он, ки айни замон бемории COVID-19 ҷомеаи ҷаҳониро ба ташвиш овардааст, вазирони тандурустии ду кишвар зарур донистанд, ки дар самти пешгирӣ ва табобати гирифторони ин вирус ҳамкории зичро ба роҳ монанд.
Зимни суҳбати ҷонибҳо масъалаҳои пешгирӣ ва табобати гирифторони сирояти COVID-19, бистаринамоии беморон, ташкили видеоконфронсҳо бо иштироки мутахассисони ду кишвар мавриди баррасӣ қарор дода шуданд.
Маврид ба зикр аст, ки бо мақсади омӯхтани таҷрибаи кишварҳои гуногун дар самти пешгирӣ ва табобати гирифторони бемории COVID-19 вазири тандурустӣ ва ҳифзи иҷтимоии аҳолии Ҷумҳурии Тоҷикистон гуфтушуниди телефониро бо вазирони як қатор давлатҳо ва созмону ташкилотҳои тандурустӣ ба роҳ мондааст.
Аз ҷумла, қаблан вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода бо вазири тандурустии Ҷумҳурии Ӯзбекистон Алишер Шадманов, Директори минтақавии Ташкилоти умумиҷаҳонии тандурустӣ дар Аврупо Ҳанс Ҳенри Клюге низ суҳбати телефонӣ анҷом дода буданд.
![](https://moh.tj/wp-content/uploads/2018/04/8678.jpg")
