3-юми апрели соли равон муовини якуми вазири тандурустӣ ва ҳифзи иҷтимоии аҳолии Ҷумҳурии Тоҷикистон Ғафур Муҳсинзода бо намояндагони Ассотсиатсияи беморхонаҳои музофоти Хубэйи Ҷумҳурии Мардумии Чин вохурӣ намуд.
Тавре иттилоъ дода шуд, Ассотсиатсияи беморхонаҳои музофоти Хубэйи Ҷумҳурии Мардумии Чин ягона ташкилоти соҳавии идоракунии беморхонаҳо дар ин музофот мебошад, ки дар маҷмӯъ 513 шӯъба, 29 кумитаи махсус ва аксари беморхонаҳои ин музофотро фаро мегирад.
Дар идомаи вохурӣ ҷонибҳо вобаста ба масъалаҳои ба роҳ мондани ҳамкориҳо байни як қатор беморхонаҳои Ҷумҳурии Тоҷикистон ва музофоти Хубэйи Ҷумҳурии Мардумии Чин дар самтҳои ҷарроҳӣ, тибби халқӣ ва дигар бахшҳо мубодилаи афкор намуданд.
Маврид ба зикри хос аст, ки имрӯзҳо ҳамкориҳои Ҷумҳурии Тоҷикистон ва Ҷумҳурии Мардумии Чин дар баробари дигар бахшҳо ҳамзамон дар соҳаи тандурустӣ низ хуб ба роҳ монда шудааст.
Дар рафти сафари Президенти Ҷумҳурии Тоҷикистон ба Ҷумҳурии Мардумии Чин 14-16 сентябри соли 2006 «Созишномаи ҳамкорӣ байни Вазорати тандурустии Ҷумҳурии Тоҷикистон ва Вазорати тандурустии Ҷумҳурии Халқии Хитой» ба имзо расидааст, ки барои васеъ намудани имкониятҳои ҳамкорӣ дар соҳаи тандурустии ду кишвар заминаи хуб гузошт.