Вазорати тандурустӣ ва ҳифзи иҷтимоии аҳолии Ҷумҳурии Тоҷикистон

Имрӯз, 18 апрели соли 2023 дар Вазорати тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода, вазири тандурустӣ ва ҳифзи иҷтимоии аҳолии Ҷумҳурии Тоҷикистон бо намояндагони Бонки Олмонии Рушд хонум Вероника Гарсия дел Арко ва Андреас Шнайдер  вохурӣ намуд.

Нахуст Ҷамолиддин Абдуллозода меҳмононро ба вазорат хайрамақдам гуфта, аз ҷумла иброз дошт, ки Бонки Олмонии Рушд  тайи солҳои охир ба соҳаи тандурустӣ ва ҳифзи иҷтимоии аҳолии мамлакат кӯмаки назаррас расонида истодааст.

Аз ҷумла, айни замон Вазорати тандурустӣ ва ҳифзи иҷтимоии аҳолии Ҷумҳурии Тоҷикистон бо дастгирии бонки мазкур лоиҳаҳои «Ҳифзи саломатии модару кӯдак ва беҳтар намудани самти ёрии таъҷилии тиббӣ дар ноҳияҳои вилояти Хатлон, марҳилаҳои 2-5» ва «Мубориза бар зидди бемориҳои сил, марҳилаи 5»-ро амалӣ намуда истодааст.

Бояд гуфт, ки аз соли 2022 дар доираи Лоиҳаи «Ҳифзи саломатии модару кӯдак ва беҳтар намудани самти ёрии таъҷилии тиббӣ дар ноҳияҳои вилояти Хатлон» марҳилаи 6 низ оғоз гардид. Дар доираи марҳилаи 6-ум сохтмон ва таҷҳизонидани Пажӯҳишгоҳи акушерӣ, гинекологӣ ва перинатологии Тоҷикистон ба нақша гирифта шудааст.

Лоиҳаҳои мазкур аз муқаррароти созишномаҳои байни Ҳукумати Ҷумҳурии Тоҷикистон ва Ҳукумати Ҷумҳурии Федеративии Олмон дар бораи ҳамкории молиявӣ сарчашма гирифта, тавассути ҷалби ширкати байналмилалии консалтингии Гопа/Инфра/Эпос татбиқ мегарданд.

Вохурӣ дар фазои дӯстӣ ва ҳусни тафоҳум баргузор гардида, ҷонибҳо ҷиҳати густариши ҳамкориҳои дуҷониба ҳавасмандии хешро иброз намуданд.