Дар шуъбаи ҷарроҳии фаврӣ, ки дар бинои тозабунёди Беморхонаи клиникавии №1-и шаҳри Хуҷанд ҷойгир аст, амалиёти ҷарроҳии муосир оид ба бартарафсозии чурраи қадкашак тариқи эндоҷарроҳӣ бомуваффақият гузаронида шуд.
Ба таъкиди мутахассисони соҳаи тиб, ин намуди ҷарроҳӣ амалиёти муосир буда, хатари ками оризаҳои пас аз ҷарроҳиро таъмин менамояд.
Махсусан, бартарафсозии чурраҳои қадкашак тариқи эндоҷарроҳӣ торафт маъмул гашта, амалиёти мазкур буридани дарози пустро талаб намекунад ва бо истифодаи якчанд сурохҳо гузаронида мешавад, ки хатари пайдоиши мушкилоти фасодию илтиҳобиро коҳиш медиҳад.
Қобили қайд аст, ки афзалиятҳои ҷарроҳии эндоскопӣ барқарорсозии тезтар, дақиқӣ ва самаранокӣ ва муҳлати кутоҳи бистаришавӣ ба шумор меравад.
Мутахассисони беморхонаи мазкур иброз медоранд, ки ҳадафи асосии ин намуди ҷарроҳӣ- ин кам кардани дард ва зудтар баргардонидани бемор ба ҳаёти фаъол мебошад. Хушбахтона, ҷарроҳӣ бомуваффақият амалӣ карда шуда, айни замон бемор дар марҳилаи пас аз ҷарроҳӣ қарор дорад.
Ёдовар мешавем, ки дар Беморхонаи клиникавии №1-и шаҳри Хуҷанд ба номи С.Урунов, имрӯзҳо тамоми шароиту имконот барои ташхису табобати саривақтӣ ва босифати беморон мавҷуд буда, табибони беморхона кушиш ба харҷ медиҳанд, ки марҳила ба марҳила усулҳои муосиру замонавии амалиётҳои ҷарроҳиро ба роҳ монанд.
