Ҷиҳати нақши бориз гузоштан дар инъикоси фаъолияти рӯзафзуни соҳаи тандурустии мамлакат ва ҳамзамон таҳияи барнома ва мавод бобати пешгирии бемории коронавируси нави COVID-19 дар Ҷумҳурии Тоҷикистон бахшида ба Рӯзи матбуоти тоҷик як қатор рӯзноманигорони ВАО ва кормандони Маркази матбуоти вазорат бо Сипосномаи Вазорати тандурустӣ ва ҳифзи иҷтимоии аҳолии Ҷумҳурии Тоҷикистон сарфароз гардонида шуданд.
Маросими тақдими сипосномаҳо ба рӯзноманигорон имрӯз, 11 март дар Вазорати тандурустӣ ва ҳифзи иҷтимоии аҳолии Ҷумҳурии Тоҷикистон доир гардид. Муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон Самариддин Ализода иштирокчён ва дар симои онҳо кулли рӯзноманигорони мамлакатро бахшида ба Рӯзи матбуоти тоҷик табрик намуд.
Номбурда иброз дошт, ки саҳми рӯзноманигорони кишвар дар давраи пандемияи COVID-19 дар самти пешгирии сирояти коронавируси нави COVID-19 хеле назаррас мебошад. Бино ба гуфтаи номбурда, маҳз дар ин давраи душвор рӯзноманигорони мамлакат дар паҳлуи Ҳукумати Тоҷикистон ва Вазорати тандурустӣ ва ҳифзи иҷтимоии аҳолии кишвар қарор гирифта, дар самти ба мардум фаҳмонидани роҳҳои пешгирии ин беморӣ саҳми калони хешро гузоштанд.
Дар анҷоми сухани табрикотии хеш Самариддин Ализода ба кулли рӯзноманигорони кишвар саломативу сарбаландӣ ва дар роҳи фаъолияти минбаъдаи кориашон барору муваффақият орзу намуд.
![](https://moh.tj/wp-content/uploads/2018/04/8678.jpg")
