Вазорати тандурустӣ ва ҳифзи иҷтимоии аҳолии Ҷумҳурии Тоҷикистон

Санаи 09 декабри соли равон дар доираи таҷлили “Рӯзи байналмиллалии мубориза бар зидди коррупсия” дар Муассисаи давлатии Маҷмааи тандурустии «Истиқлол» вохурии кормандони Агентии назорати давлатии молиявӣ ва мубориза бо коррупсия, бо кормандони соҳаи тандурустии шаҳри Душанбе баргузор гардид.

Дар оғоз Сардори раёсати тандурустии шаҳри Душанбе Хушвахт Шарифзода ҳозиринро ба муносибати “Рӯзи байналмиллалии мубориза бар зидди коррупсия” шодбош гуфта, аз ҷумла иброз дошт ки,  “мо табибон як масъулияти ниҳоят бузургро бар дӯш дорем ва бояд пайваста савияи дониш ва малакаи хешро такмил дода, риояи тартиботи ҷамъиятӣ махсусан одоби муоширатро  хуб ба роҳ монем”.

Дар чорабинии мазкур ҳамзамон кормандон ва намояндагони Агентии назорати давлатии молиявӣ ва мубориза бо коррупсияи Ҷумҳурии Тоҷикистон оид ба  ҳолатҳои  коррупсионӣ ва роҳҳои мубориза алайли ин зуҳурот суханронӣ намуданд. Дар рафти чорабинӣ  Алишер Носирӣ, муовини сардори шуъбаи пешгирии коррупсия дар раёсати Агентии назорати давлатии молиявӣ ва мубориза бо коррупсия дар ш Душанбе, баромад намуда ба ҳозирин  иброз дошт, ки “Коррупсия феълан падидаи иҷтимоиест, ки дар тафаккури ҷамъиятӣ низ фаҳмиш ва тафсири якхела надорад. Имрӯзҳо муносибати шаҳрвандон бо коррупсия гуногун буда, онро бо ришва, сӯиистифода аз мансаб, пораситонӣ, судхӯрӣ ва ғайра мешуморанд. Бо вуҷуди ин ҳама новобаста аз зиёд будани фаҳмиш ва нуқтаи назари гуногун  нисбати коррупсия, аксарияти одамон дар ақидаанд, ки ин амалҳам чун зуҳуроти манфӣ пояҳои ҷомеаро вайрон намуда, таҳаввулоти ҷомеаро зери хатар мегузорад.  Дар ҳамин замина аз тамоми иштирокчиён даъват ба амал оварда мешавад, ки ба ин зуҳуроти номатлуб даст назада, баракс барои пешгирии ҳолатҳои коррупсионӣ саҳмгузор бошанд”.

Маврид ба зикр аст, ки  31 октябри соли 2003 Конвенсияи Созмони Милали Муттаҳид  ҷиҳати  мубориза алайҳи коррупсия, пешгирии сабаб ва омилҳои пайдоиши он,  инчунин бо мақсади решакан намудани ин зуҳурот   “Рӯзи байналмиллалии мубориза бар зидди коррупсия”-ро  эълон намуд. Муҳимияти ин ҳуҷҷати Созмони Милали Муттаҳидро ба назар гирифта Ҷумҳурии Тоҷикистон яке аз аввалинҳо шуда, 25 сентябри соли 2006 ба он имзо гузошт. Конвенсияи мазкур 16 апрели соли 2008 аз ҷониби Маҷлиси намояндагони Маҷлиси Олии Ҷумҳурии Тоҷикистон тасдиқ шуда, минбаъд қисми таркибии системаи ҳуқуқии мо башумор рафта, ҳамаи қонунҳои қабулгардида ба стандартҳои байналмилалӣ мутобиқ гардонида шуда истодаанд.